Astanada VI respýblıkalyq «Tańsholpan» balalar konkýrsy bastaldy

Baıqaý jetim balalar men ata-anasynyń qamqorlyǵynsyz qalǵan balalarǵa arnalǵan bilim berý uıymdarynyń tárbıelenýshileri arasynda ótýde. «Biz - seniń balalaryńbyz, Qazaqstan! Biz jańa álemde ómir súremiz!» atty búkilqazaqstandyq is-shara aıasynda uıymdastyrylǵan bul konkýrs QR Táýelsizdiginiń 20 jyldyǵyna arnalǵan.

Jyl saıyn QR Bilim jáne ǵylym mınıstrliginiń qoldaýymen ótetin bul is-sharanyń ashylý saltanatyna QR Bilim jáne ǵylym vıtse-mınıstri Mahmetǵalı Sarybekov qatysty.

«Búgin Qazaqstannyń barlyq oblystarynda «Meniń Qazaqstanym!» degen taqyryppen ár túrli is-sharalar ótip jatyr. Sebebi, bul aı Elbasymyzdyń úkimimen - patrıotızm aıy dep jarııalandy. Al «Tań Sholpan» baıqaýy bolsa, osy patrıotızm aıynyń alǵashqy qadamy desek te bolady», - dep atap ótken M. Sarybekov, baıqaýdyń negizgi maqsaty - shyǵarmashylyq áleýeti joǵary jastarymyzdyń talantyn syrtqa shyǵarýǵa kómektesip, qabiletin kórsetý ekendigin atap ótti.

«Jyl boıynda jas jetkinshekterimiz daıyndaldy, baıqaýǵa qatysýǵa asyqty, onyń bastalýyn asyǵa kútti. Munyń ózi baıqaýdyń ózindik orny qalyptasqandyǵyn kórsetip tur», - deıdi vıtse-mınıstr.

QR halyq ártisi, Qazaq ulttyq óner ýnıversıtetiniń rektory, professor Aıman Musaqojaevanyń aıtýynsha, «Tańsholpan» jyl saıyn uıymdastyrylatyn dástúrli baıqaýǵa aınalyp keledi. 2006 jyldan beri uıymdastyrylyp kele jatqan bul is-sharaǵa 10-18 jas aralyǵyndaǵy 150-den astam jas jetkinshekter qatysýda.

Baıqaýdyń ashylýynda sóz alǵan A. Musaqojaeva jas ónerpazdarǵa, «óner aıasyndaǵy osyndaı baıqaýdyń uıymdastyrylyp otyrǵanyn men óte quptaımyn, erteńgi kúni osy jas daryndarymyz óner áleminde de úlken jetistikterge jetedi degen oıdamyn», - dep sáttilik tiledi.