Astanada VI Respýblıkalyq «Elim meniń» patrıottyq ánder baıqaýy ótedi
ASTANA. Aqpannyń 8-i. QazAqparat /Jasulan Amanbaıuly/ - Aqpannyń 11-i kúni Elordadaǵy K. Baıseıitova atyndaǵy Ulttyq opera jáne balet teatrynda VI Respýblıkalyq «Elim meniń» patrıottyq ánder baıqaýynyń jeńimpazdaryn marapattaý rásimi ótedi,
dep habarlaıdy QazAqparat «Qazaq áýenderi» AQ-yna silteme jasap.
Sharanyń negizgi maqsaty - keıingi jas býyndy ulttyq rýhanı qundylyqtarǵa tárbıeleý, otandyq kompozıtorlar men aqyndardyń shyǵarmashylyǵyn qoldaý, oryndaýshylardyń kásibı sheberlikteriniń ósýine yqpal jasap, jas daryn ıeleriniń qataryn tolyqtyrý.
Bıylǵy baıqaýǵa Qazaqstannyń ár aımaqtaryndaǵy 86 kompozıtor qatysyp, olardyń 200-ge tarta shyǵarmalary qaraldy. Bul shyǵarmalar birneshe atalymdar boıynsha iriktelip alynady. Atap aıtqanda Otan, el, jer týraly ánder «Atameken» atalymy boıynsha, ulttyq rýhanı qundylyqtar, erlik pen eldiktiń tarıhı shejireli betteri, qasıetti de qasterli tulǵalar týraly ánder «Amanat» atalymy boıynsha, áskerı taqyryptaǵy ánder «Án sal, sarbaz!» jáne Keńes Odaǵynyń Batyry Baýyrjan Momyshulynyń qurmetine arnalǵan «Eldiń eri - Baýyrjan» atalymdary boıynsha úzdik týyndylar tańdalady.
Baıqaý jas urpaqtyń boıyna Otanǵa degen sheksiz mahabbatqa qozǵaý salyp, qazaqtyń tarıhı jáne rýhanı qundylyqtaryn baǵalaýǵa ózindik úles qosyp keledi.
Ádilqazy alqasy memlekettik organdardyń, shyǵarmashylyq odaqtardyń, mádenıet pen óner salasynyń beldi ókilderinen quralǵan.
Mádenı shara Qazaqstan Respýblıkasynyń Mádenıet jáne aqparat mınıstrligi, «Qazaq áýenderi» AQ uıymdastyrýymen ótkiziledi.
