Astanada VI Búkilqazaqstandyq stýdenttik ýnıversıada aıasynda bokstan jarystar ótedi

Sporttyń birneshe túrin qamtıtyn Búkilqazaqstandyq stýdenttik ýnıversıadanyń kezekti jarystaryn ótkizý máselesi ótken aqpan aıynyń 15-i kúni QR Bilim jáne ǵylym mınıstrligi dene tárbıesiniń ulttyq ǵylymı-praktıkalyq ortalyǵynda talqylandy. Keńeske Qazaqstandaǵy joǵary oqý oryndarynyń basshylary qatysty.

Óz kezeginde, elordadaǵy S.Seıfýllın atyndaǵy Qazaq agrotehnıkalyq ýnıversıteti, búgingi kúni oqý orny qabyrǵasynda sporttyń joǵary sheberlik dárejesindegi 10 sportshy bilim alatynyn negiz etip, VI ýnıversıada aıasyndaǵy bokstan jarystardy óz ýnıversıtetinde ótkizý usynysyn jasady.

Aıta keteıik, jarty ǵasyrdan astam tarıhy bar Astanadaǵy Agrarlyq ýnıversıtet elge sapaly bilimimen ǵana emes, beldi sportshylarymen jáne daryndy shyǵarmashylyq ujymdarymen belgili. JOO-dan túlep ushqan tájirıbeli boksshylardyń arasynan Beıjiń oıyndarynyń qatysýshysy Mereı Aqshalovty aıtýǵa bolady, al búgingi kúni bilim nárin sýsyndap júrgen jas órenderdiń arasynda sport sheberi, Gýandjoýda ótken 16-shy Jazǵy Azııa oıyndarynyń jeńimpazy Danııar Eleýsinov, halyqaralyq dárejedegi sport sheberi Qazaqstan chempıony Baqytjan Qojabekov, Qazaqstan chempıony Іlııas Súleımenov, Qazaqstan chempıony, halyqaralyq jarystardyń júldegeri Dýman Álimovter bar.

«Respýblıkalyq deńgeıdegi jarystyń ýnıversıtet qabyrǵasynda ótýi - sporttyń bul túriniń stýdentterimiz arasynda taralýyna septigin tıgizip, bas qalamyzdyń bedelin taǵy bir márte arttyra túsedi degen senimdemiz. Óz kezegimizde jarystardy joǵary deńgeıde ótkizýge barynsha jaǵdaı jasaımyz», - dep atap ótti tárbıe jáne áleýmettik máseleler jónindegi prorektor Aleksandr Maıer.

Búgingi kúnge deıin jarysqa qatysý nıetterin Astana, Almaty, Taraz, Shymkent, Qaraǵandy, Qyzylorda, Pavlodar, Qostanaı, Aqtóbe qalalarynyń JOO-lary bildirdi.