Astanada VI Búkilqazaqstandyq stýdenttik ýnıversıada aıasynda bokstan jarystar aıaqtaldy

«Jastar» saraıynda bes kún boıy Qazaqstannyń 30 joǵary oqý ornynan kelgen 165 (qyzdar - 21, erler - 144) boksshy baq talastyrdy. Jarystardy uıymdastyrýshy S.Seıfýllın atyndaǵy Qazaq agrotehnıkalyq ýnıversıteti boldy. Erler arasyndaǵy juptar - 10, áıelder arasyndaǵy juptar 3 salmaqtyq dárejeleri boıynsha alańǵa shyqty.

Jarys nátıjesinde jeńimpaz atanǵandar: N.Abjanov (49 keli, S.Seıfýllın atyndaǵy QazATÝ, Astana); Q.Turǵanbaev (52 keli, Qaraǵandy Memlekettik ýnıversıteti, Qaraǵandy); D.Jumsaqbaev (56 keli, S.Seıfýllın atyndaǵy QazATÝ, Astana); A.Jeńisbekov (60 keli, Qazaqtyń Sport jáne týrızm akademııasy, Almaty); A.Qudasov (64 keli, S.Seıfýllın atyndaǵy QazATÝ, Astana); B.Qojabekov (69 keli, S.Seıfýllın atyndaǵy QazATÝ); A.Raqyshev (75 keli, Semeı Memlekettik ýnıversıteti, Semeı); A.Abdýǵanıev (81 keli, Taraz Memlekettik ýnıversıteti, Taraz); A.Ábildınov (91 keli, Qaraǵandy Memlekettik ýnıversıteti, Qaraǵandy); D.Ospanov (91 keliden joǵary, OQ Memlekettik ýnıversıteti, Shymkent).

Áıelder arasyndaǵy básekede: M.Túmenbaeva (51 keli, Qazaq Ulttyq ýnıversıteti, Almaty), Sh.Isahanova (60 keli, Qyzylorda Memlekettik ýnıversıteti, Qyzylorda) jáne S.Kovalevskaıa (75 keli, Qaraǵandy Memlekettik ýnıversıteti, Qaraǵandy) jeńimpaz atandy.

Jalpy komandalyq esepte birinshi oryndy S.Seıfýllın atyndaǵy QazATÝ, ekinshi oryndy - E.Bóketov atyndaǵy QarMÝ, úshinshi oryndy - M.Áýezov atyndaǵy OQMÝ ıelendi.

Sondaı-aq birneshe atalymdar boıynsha «úzdikter» arnaıy Kýboktarmen marapattaldy. Atap aıtqanda, «eń úzdik boksshy» ataǵyn áıelder arasynda M.Túmenbaeva (QazUÝ, Almaty), erler arasynda N.Abjanov (S.Seıfýllın atyndaǵy QazATÝ, Astana) ıelendi. «Eń úzdik» bapker Kýbogyna QR eńbek sińirgen jattyqtyrýshysy Janat Manashev laıyq dep tabylsa, «eń úzdik tóreshi» Erjan Ospanov ataldy.

Jarystardyń bas tóreshisi Eleýsiz Dúısekov atap kórsetkendeı, Búkilqazaqstandyq stýdenttik ýnıversıada aıasynda bokstan jarystar Astanada alǵash ret ótkizilip otyr jáne ol qurmetke sapaly bilimimen birge, el ishinde jáne odan tys aýmaqtarda beldi sportshylarymen jáne daryndy shyǵarmashylyq ujymdarymen tanymal - S.Seıfýllın atyndaǵy QazATÝ ıe boldy.

«Astananyń Agrarlyq ýnıversıtettiń boksshylary jaqsy óner kórsetti. Sebebi olardyń arasynda 5-6 bala ulttyq quramanyń músheleri bolyp tabylady», - dedi ol. Aıta keteıik, atalmysh ýnıversıtetten jarysta 10 bylǵary qolǵap sheberi kúsh synasty. Qazaqstannyń sport sheberi, Gýandjoýda ótken 16-shy Jazǵy Azııa oıyndarynyń chempıony Danııar Eleýsinov bul kúnderi halyqaralyq deńgeıdegi jarysta óner kórsetip júrgen bolsa, halyqaralyq jarystardyń júldegeri Dýman Álimov naýqasyna baılanysty qatysa almady.

E.Dúısekovtyń aıtýynsha, áıelder arasyndaǵy bokstaǵy sońǵy jańalyq - kez-kelgen deńgeıdegi jarystarǵa Olımpıada oıyndaryna kiretin úsh salmaq dárejesiniń (51,60 jáne 75 keli) engizilýi. Sondaı-aq ol, ýnıversıada jeńimpazdaryna «sport sheberi» dárejesin berý kerek dep esepteıdi. Qazir bul usynys QR Týrızm jáne sport mınıstrligi Sport komıtetinde qaralyp jatyr.

Al S.Seıfýllın atyndaǵy QazATÝ rektory Aıtbaı Bulashevtyń pikirinshe, bokstan respýblıkalyq ýnıversıadanyń Astanada ótýi - ýnıversıtettiń atalmysh sport túri boıynsha sońǵy bes jylda jetken jetistiginiń jemisi. «Bizdiń maqsatymyz boksshylardy daıyndaý emes, bilikti, bilimdi, deni saý, jan-jaqty damyǵan jáne salaýatty ómirdi ózine serik etken jastardy daıarlaý bolyp tabylady. Menińshe, jeńilgen komanda joq. Salaýatty ómir salty bárimizdi jeńiske jetkizdi», - dedi ol.

Rektordyń sózine qaraǵanda, jas boksshylarǵa sheberlikterin shyńdaýǵa, sportty bilimmen qatar alyp júrýge barynsha qolaıly jaǵdaılar jasalyp otyr. Búginde olar jetken jeńisteriniń deńgeıine baılanysty oqý aqysynda 25, 50 paıyz jeńildikter alyp otyr. Al basynda aqyly bólimge oqýǵa túsken halyqaralyq dárejedegi sport sheberi, Qazaqstan chempıony Baqytjan Qojabekov qazir 100 paıyz tegin oqıdy.

«Boks - ýnıversıtetimizde brendke aınalǵan ekinshi sport túri. Birinshisi - basketboldan erler jáne áıelder («Astana barystary») komandalary. Stýdenttik kezde sheberlerdi daıyndaý óte qıyn. Olar oqýlarymen birge sportty qatar alyp júrýi kerek. Sondyqtan bizdiń ustazdarymyz olarǵa túsinistikpen qaraıdy. Jibergen sabaqtaryn keıinirek jeke keste arqyly oqýyna jaǵdaı jasap otyrmyz», - dedi A.Bulashev.