Astanada VI Azııa Olımpıadalyq keńesiniń sportshylar forýmyna 120-dan asa adam qatysady
ASTANA. KAZINFORM - 2-3 qyrkúıek kúnderi elordada Olympic Solidarity baǵdarlamasy aıasynda Azııa Olımpıadalyq Keńesiniń (AOK) VI Qurlyqtyq sportshylar forýmy ótedi, dep habarlaıdy Ulttyq olımpıadalyq komıtet.
Bul forým - qurlyq sportshylary bas qosyp, pikir almasyp, sportty damytý, olımpıadalyq qundylyqtardy nyǵaıtý jáne atletterdiń múddelerin qorǵaý máselelerin talqylaıtyn mańyzdy shara.
Forýmǵa Azııanyń 45 ulttyq olımpıadalyq komıtetiniń ókilderi, Halyqaralyq Olımpıadalyq komıtetiniń músheleri men AOK basshylary qatysady. Qatysýshylar sany 120-dan asady.
Baǵdarlamada pikirtalas alańdary, jumys toptary, semınarlar jáne ashyq dıalogtar uıymdastyrý josparlanǵan. Sondaı-aq forým aıasynda Astananyń Ortalyq saıabaǵynda 2026 jylǵy Aıchı-Nagoıa Azııa oıyndaryn qoldaýǵa arnalǵan sımvoldyq Fun Run júgirý sharasy uıymdastyrylady.
Spıkerler qatarynda Olympic Solidarity baǵdarlamasy dırektorynyń orynbasary Olıve Nıamkı, Olympic Solidarity baǵdarlamasynyń qurlyqtyq menedjeri Edvard Kensıngton, HOK Sportshylar komıssııasynyń tóraǵasy Emma Terho, HOK Sportshylar komıssııasynyń qoldaý jónindegi menedjeri Artýr Mılroı, HOK Sportshylar komıssııasynyń múshesi Masoma Alı Zada, HOK múshesi Chjan Hýn, AOK Sportshylar komıssııasynyń tóraǵasy Nın Dın, AOK Sportshylar komıssııasynyń teń tóraǵasy Shıva Keshavan, AOK Sportshylar komıssııasynyń músheleri Shaına Eng pen Taı Terrı, AOK Sportshylarmen jumys departamentiniń menedjeri Djamıang Namgıal, QR UOK Sportshylar komıssııasynyń tóraıymy ári AOK Atqarý komıtetiniń múshesi Olga Rypakova, frıstaıl-akrobatıkadan úsh birdeı Olımpıada qatysýshysy Janbota Aldabergenova, sondaı-aq, QR UOK Sport departamentiniń jetekshi menedjeri Aıym Jetibaeva bar.
Edvard Kensıngton men Olıve Nıamkı Olympic Solidarity baǵdarlamasy aıasynda sportshylarǵa arnalǵan shákirtaqylar týraly málimet berse, Emma Terho, Chjan Hýn jáne Masoma Alı Zada HOK Sportshylar komıssııasynyń jumysyna qatysty jańalyqtardy jarııalaıdy. Artýr Mılroı komıssııany qoldaý múmkindikterin túsindiredi. Sondaı-aq AINAGOC jáne Aıchı-Nagoıa 2026 uıymdastyrý komıtetteriniń ókilderi aldaǵy Azııa oıyndaryna qatysty ózekti aqparattar týraly aıtady.
Forýmǵa Olımpıada oıyndarynyń júldegerleri de qatysady. Olardyń qatarynda ońtústikkoreıalyq bobsleıshi ıÝndjon Von, taekvondoshy Rohýlla Nıkpaı (Aýǵanstan), boksshy Mavzýna Chorıeva (Tájikstan), taekvondoshy Bagerı Mohammad (Iran), kanoede eskek esýshi Takýıa Haneda (Japonııa), taekvondoshy Chanatıp Songham (Taıland) bar.
Forým nátıjesinde sportshylardyń jaǵdaıyn jaqsartýǵa jáne olardyń Olımpıadalyq qozǵalysqa qosatyn úlesin arttyrýǵa arnalǵan jańa usynystar men bastamalar qabyldanady.
Osyǵan dein Astanada at sportynan Konstıtýtsııanyń 30 jyldyǵyna arnalǵan jarys ótip jatqany týraly jazdyq.
