Astanada veıpter men hosh ıistendirgishterdiń zańsyz aınalymyn uıymdastyrǵan iri jeli áshkerelendi
ASTANA. KAZINFORM – Astana qalasy boıynsha Qarjylyq monıtorıng agenttiginiń departamenti elektrondyq tutyný júıeleri (veıpter), hosh ıistendirgishter men olarǵa arnalǵan suıyqtyqtardyń zańsyz aınalymyn júrgizgen iri kóterme jeliniń qyzmetin toqtatty.
Agenttik málimetinshe, atalǵan ónimder Qazaqstannyń barlyq óńirlerine Telegram messendjeri jáne kýrerlik jetkizý arqyly taratylyp otyrǵan. Jedel-izdestirý is-sharalary barysynda 5 qoıma anyqtaldy.
- Tintý kezinde 490 myńnan astam veıp tárkilendi. Olardyń satylymynan túsetin zańsyz kiris 6 mlrd teńgeden asýy múmkin edi, - delingen aqparatta.
Budan bólek, kúdiktiler qylmystyq jolmen alynǵan kiristerdi zańdastyrý shemasyn uıymdastyrǵan. Olar iri somalardy qolma-qol aqshaǵa aınaldyrý jáne aqshanyń izin jasyrý úshin atyna banktik kartalar resimdelgen adamdardy (droperlerdi) paıdalanǵan.
Qylmystyq tabystyń bir bóligi jalpy somasy 92 mln teńgeden asatyn shetelden kofe jetkizý mámilelerine baǵyttalǵan.
Sot sanktsııasymen tyıym salynǵan ónimderdi tasymaldaýǵa paıdalanylǵan avtokólikke tyıym salyndy.
Zańsyz bıznestiń uıymdastyrýshylaryna izdeý jarııalandy. Olar qamaýǵa alý túrindegi bultartpaý sharasymen izdestirilýde.
Tergeý jalǵasyp jatyr. QR QPK 201-babyna sáıkes ózge aqparat jarııa etilmeıdi.
Aıta keteıik, buǵan deıin de Telegram-arnasy arqyly veıp satqan top ustalǵan bolatyn.