Astanada velojarys ótýine baılanysty kólik qozǵalysyna shekteý qoıylady
ASTANA. QazAqparat - «Astana EXPO 2017 International Criterium» tas joldaǵy kásibı velojarysy ótýine baılanysty 12 tamyz kúni keı jerlerde kólik qozǵalysyna shekteý qoıylady, dep habarlaıdy Astana qalasy ІІD baspasóz qyzmeti.
12.30-14.00 aralyǵynda Turan dańǵylynyń boıy (Saraıshyq kóshesinen Uly Dala kóshesine deıin), Uly Dala kóshesiniń boıy (Turan dańǵylynan Máńgilik el kóshesine deıin), Máńgilik el kóshesinde (Uly Daladan Saraıshyq kóshesine deıin) kólik qozǵalysyna shekteý qoıylady. Sondaı-aq, Qonaev, Aqmeshit, Dostyq jáne Túrkistan kósheleri aýmaǵynda kólik quraldarynyń qozǵalysy tolyqtaı toqtatylady.
«Qala turǵyndary men qonaqtarynan elorda kóshelerindegi keptelisterdi boldyrmaý maqsatynda baǵyttaryn aldyn ala josparlap alýlaryn suraımyz»,- delingen baspasóz qyzmetiniń habarlamasynda.
