Astanada velosporttan áýesqoılar arasynda elimizdegi alǵashqy ashyq chempıonat ótip jatyr
ASTANA. QazAqparat - Astanada velosporttan 19-20 qyrkúıek aralyǵynda áýesqoılar arasynda ótetin ashyq chempıonat bastaldy. Sharany «Good Energy» velosıped klýby uıymdastyryp jatyr.
Birer sát buryn jekeleı jarys boıynsha doda bastalyp ketti, ol 09:00-12:00 saǵat aralyǵynda ótkiziledi dep josparlanǵan. Al 15:00-18:00 saǵat aralyǵynda toptyq jarys ótedi. Áýesqoılar Telman kentinen ońtústik aınalma jol arqyly Qaraǵandy tasjolyna deıin jarysady.
Jeksenbi kúni, 20 qyrkúıekte «Astana Arena» stadıony alańynda Sprint Challenge saıysy ótedi. Jarysta 500 metrlik qashyqtyqta «Úzdik sprınt» ataǵy sarapqa salynady.
Sonymen qatar, 20 qyrkúıekte 09:00-14:30 «Otbasylyq sprınt» jáne «Baldyrǵan» atty saıystar ótedi. Otbasylyq sprıntke 7 jasqa deıingi balasy bar erli-zaıyptylar qatysa alady. «Baldyrǵan» saıysy 50 metr qashyqtyqta 3 dóńgelekti velosıpedtermen ótkiziledi. Qatysýshylar men jeńimpazdarǵa estelik syılyqtar tabys etiledi, dep habarlady elorda ákimdiginiń baspasóz qyzmeti.
