Astanada velosporttan Álem chempıonaty ótýi múmkin

ASTANA. QazAqparat - Astanaǵa arnaıy saparmen kelgen Halyqaralyq velosıpedshiler odaǵynyń (UCI) prezıdenti Davıd Lapparten Astanada velosporttan álem chempıonatyn erteń-aq ótkizýge bolatynyn málim etti, dep habarlaıdy «QazAqparat» HAA tilshisi QR Mádenıet jáne sport mınıstrligine silteme jasap.

Qazaqstanǵa kelgen Davıd Lapparten QR Mádenıet jáne sport mınıstri Arystanbek Muhamedıulymen jáne Qazaqstannyń velosıped sporty federatsııasynyń prezıdenti Darhan Kaletaevpen kezdesti. Júzdesý barysynda Halyqaralyq uıymnyń qazaqstandyq tarappen baılanysy, sondaı-aq álem, sonyń ishinde Azııa óńirinde velosportty damytý josparlary talqylandy.

Eske sala ketsek, D avıd Lapparten ótken aıda ǵana UCI basshysy bolyp saılanǵan bolatyn.  45 daýystyń 37-sin ıelengen ol, sol ýaqyttaǵy UCI prezıdenti Braıan Kýksonnyń ornyn basqan bolatyn. Davıd Lapparten óz baǵdarlamasynda ulttyq federatsııalarmen seriktestikti nyǵaıtyp, velosporttyń damýyna barynsha kúsh salýǵa nıetti.

Kezdesý barysynda Davıd Lapparten álemdik sport jóninde josparlarymen bólise otyryp, Álemdik týrǵa, sonyń ishinde saıysty uıymdastyrýshylar men komandalardyń jetekshilerine qatysty birqatar reformalardyń qajettigin atap ótti. UCI jańa prezıdenti Azııa óńirinde ǵalamshar halqynyń basym bóligi ómir súrip jatqandyqtan, UCI buǵan erekshe nazar aýdaratynyn aıtty. Sondaı-aq UCI men Qazaqstannyń velosıped sporty federatsııasynyń seriktestigi nyǵaıa túsetinine zor senim bildirdi.

«Qazaqstan velosporttan Azııa qurlyǵyndaǵy kóshbasshy jáne álem boıynsha  kóshbasshylardyń biri bolyp tabylady. Qazaqstan Álemdik týrǵa velokomandany shyǵarǵan Azııadaǵy birinshi memleket. Velokomanda sońǵy 10 jylda Grand-týrlarda 8 márte jeńiske jetti. «Astana Pro Team» aldaǵy ýaqytta da Qazaqstandy ǵana emes, búkil álemdegi jankúıerlerin qýanta berse eken deımin. Qazaqstan jas memleket bola tura, jyldar boıy qalyptasqan velosporttyń dástúrin ózine sińirip, tyń ózgeristerdi qabyldaı bildi», - deıdi Davıd Lapparten.

Sonymen birge, Halyqaralyq velosıpedshiler odaǵynyń prezıdenti «Saryarqa» velotregine  joǵary baǵa berdi.

«UCI Qazaqstanda halyqaralyq aýqymda saıys ótkizý jumysyna zor qyzyǵýshylyq tanytady. Sondaı-aq Qazaqstan Eýropa men Azııanyń arasyndaǵy halyqaralyq konferentsııalar men kongresterdi ótkizýde taptyrmas alań bola alady. Men qazaqstandyq velotrektiń aýqymyna tańǵaldym - erteń-aq munda álem chempıonatyn ótkize berýge bolady. Búgingi kúni álem chempıonatyn aldaǵy 3 jylda ótkizetin memleketter belgili bolyp qoıǵandyqtan, UCI bul suraqqa 2020 jyly qaıta oralatyn bolady», - deıdi ol.

Davıd Lapparten sonymen qatar, jyl saıyn ótkiziletin «Týr Almaty» kásibı velosaıysyna qatysty pikirin bildirdi. 

«Týr Almaty - Ortalyq Azııa aýmaǵyndaǵy biregeı velosaıys. UCI atalǵan jarystyń álemdik kúntizbede ózindik ornyn tabýyna qyzyǵýshylyq bildiredi», - deıdi Davıd Lapparten.