Astanada vandalızm jasaǵany úshin shamamen 3 myń adam jaýapqa tartyldy

ASTANA. KAZINFORM — Astanada vandalızm men qoǵamdyq tártipti buzýdyń aldyn alý jáne onymen kúresý baǵytynda júıeli jumys jalǵasyp jatyr. Kezekti quqyqbuzýshylardy polıtseıler anyqtap, jaýapqa tartty, dep habarlaıdy Astana ákimdiginiń resmı saıty.

Polıtsııa qyzmetkerleri qoǵamdyq oryndardaǵy nysandardyń búlinýine qatysty eki jaǵdaıdy anyqtady. Birinshi jaǵdaıda 40 jastaǵy er adam alkogoldik masań kúıde Shoqan Ýálıhanov kóshesindegi aıaldama pavılonyn búldirgen. Ol shyny esikke birneshe ret uryp syndyrǵan. Sot qaýlysyna sáıkes, quqyqbuzýshy 5 táýlikke qamaýǵa alyndy.

Ekinshi jaǵdaıda Bógenbaı batyr dańǵylynda 19 jastaǵy jigit mas kúıde ári janjal kezinde jeke ǵımarattyń syrtqy qaptamasyna teýip, jarnamalyq qurylymdy jáne jyly aıaldama janyndaǵy qabyrǵanyń bir bóligin búldirgen. Ol usaq buzaqylyq jasaǵany úshin 10 táýlikke qamaýǵa alynyp, ákimshilik qamaýǵa alynǵandarǵa arnalǵan arnaıy qabyldaǵyshqa jetkizildi. Atalǵan faktiler boıynsha keltirilgen materıaldyq shyǵyn kólemi eseptelip jatyr. Keıin shyǵyndy óndirý týraly talap qoıylady.

— Jyl basynan beri osyndaı quqyqbuzýshylyqtar úshin shamamen 3 myń adam jaýapqa tartylǵan. Sonymen qatar, bótenniń múlkin qasaqana joıý nemese búldirý boıynsha 200-den astam jaǵdaı tirkelgen, — delingen habarlamada.

Elorda polıtsııasy qoǵamdyq oryndarda quqyqbuzýshylyqqa jol bermeý kerektigin eskertedi jáne turǵyndardy zań men tártipti qatań saqtaýǵa shaqyrady.

Osyǵan deıin Memleket basshysy vandalızmdi qabyldaýǵa bolmaıdy, buzaqylardy zań boıynsha jaýapkershilikke tartý kerek ekenin basa aıtqan edi.