Astanada vaktsına salatyn pýnktiler tún jarymyna deıin jumys isteıdi

NUR-SULTAN. QazAqparat - Nur-Sultan qalasynyń ákimi Altaı Kólginov onlaın rejımde medıtsına mekemeleriniń bas dárigerlerimen kezdesý ótkizip, qazirgi jaǵdaıdy talqylady, dep habarlaıdy QazAqparat.

«Álemdik pandemııa adamdardy eki stsenarııdiń aldyna qoıady: birinshisi – vaktsına egip, ózin jáne aınalasyndaǵylardy qorǵaý, ekinshisi – indetke shaldyǵý. Ekinshi nusqaǵa keletin bolsaq, adam óziniń densaýlyǵyna qaýipti ári ımmýnıtetti álsiretetin koronavırýs ınfektsııasyn jeńe alatynyn aldyn ala bile almaıdy. Jaǵdaıǵa nemquraılyqpen qarap, vaktsınatsııany elemeı, aınaladaǵy adamdarǵa vırýs juqtyrýy múmkin. Al bul ınfektsııanyń haotıkalyq taralýyna múmkindik beredi. Medıtsına qyzmetkerleri vaktsınatsııany 1 aqpannan bastady. Birinshi kezeńde ekpe indetpen kúreste aldyńǵy shepte júrgen medıtsına qyzmetkerlerine, muǵalimderge, tártip saqshylaryna jáne basqalar egildi. 20 myńnan astam adam qamtyldy» dep jazdy shahar basshysy Instagram paraqshasynda.

Onyń aıtýynsha, ekinshi kezeńde turǵyndardy vaktsınalaý qarastyrylǵan.

6 sáýirde qala turǵyndary arasynda ekpe alýǵa aldyn ala jazylý bastaldy.

Bul adamdardyń bir mezgilde jınalýyn boldyrmaýǵa, vaktsınalardy medıtsınalyq mekemelerge birkelki taratýǵa múmkindik beredi.

«Birinshi. Turǵyndardy jappaı vaktsınalaý medıtsına qyzmetkerlerinen kásibılikti, jaýapkershilikti talap etedi. Dárigerlerge taǵy bir márte nusqaý berildi. Olar vaktsınany ekpeı turyp naýqastyń densaýlyǵyn tekserýi kerek.

Ekinshi. Medıtsınalyq mekemelerge qosymsha jabdyqtar ornatyldy: 40-tan astam tońazytqysh qondyrǵylary, vaktsınalardy tasymaldaýǵa arnalǵan 80-nen astam termokonteıner jáne basqa. Egý pýnktileriniń sany 36-dan 100-ge deıin ósti. Vaktsınatsııa pýnkteriniń jumys ýaqyty saǵat 8:00-den 00:00-ge deıin uzartyldy.

Úshinshi. «Mega Silk Way» sııaqty birqatar SOO-da vaktsınatsııa pýnktin ashý úshin ınfraqurylym daıyndap jatyrmyz. Tirkeý, kútý, tekserý jáne basqa aımaqtar bolady» deıdi Altaı Kólginov.

Ákimniń sózine qaraǵanda, mundaı oryndar adam kóp jınalatyn jerlerde jumys isteıtin ujymdardy ýaqytyly qamtýǵa múmkindik beredi, osylaısha olardy qorǵaıdy.

Qajet bolǵan jaǵdaıda qalanyń qonaq úılerinde de egý pýnkteri ashylady.

«Tek jappaı vaktsınatsııa ujymdyq ımmýnıtetti qalyptastyrýa, koronavırýstyń taralýyn toqtatýǵa kómektesedi» dep túıindedi sózin qala basshysy.