Astanada V Respýblıkalyq shahmat týrnıri bastaldy
ASTANA. 2 qarasha. QazAqparat /Arman Asqarov/ - Búgin Astanada elimizdiń belgili shahmatshysy, halyqaralyq grossmeıster Dármen Sádýaqasovtyń Kýbogy úshin oqýshylar arasynda V Respýblıkalyq shahmat týrnıri bastaldy. Atalmysh sharany Bilim jáne ǵylym mınıstrliginiń "Daryn" respýblıkalyq ǵylymı-tájirıbelik ortalyǵy uıymdastyryp otyr.
Týrnırdiń saltanatty ashylý rásimine qatysqan QR Shahmat federatsııasynyń prezıdenti, vıtse-premer Áset Isekeshev Grekııada ótken shahmattan Álem chempıonatynda jeńimpaz atanǵan Dınara Sádýaqasovany jáne osy halyqaralyq dodada ekinshi orynǵa ıe bolǵan 10-jasar Jansaıa Ábdimálikti Elbasy Nursultan Nazarbaev pen el Úkimeti atynan quttyqtap, óziniń izgi tilegin jetkizdi.
Biz bárimiz bilemiz, shahmat adamdy júıeli túrde oılaýǵa úıretedi. Osyndaı oılaý qabileti bar jastar bizge, bizdiń ekonomıkamyzǵa aýadaı qajet. Men ózim jaqynda ǵana qurylǵan Qazaqstan Respýblıkasy Shahmat federatsııasynyń prezıdenti retinde Sizderdi osy shahmat oıynynyń bizdiń elimizde damýdyń jańasha satysyna shyǵatyndyǵyna sendirgim keledi. Biz shahmattyń barlyq bilim berý nysandarynda qolǵa alynýyn qamtamasyz etip, oblystyq jáne respýblıkalyq saıystardy ótkizýdi kózdep otyrmyz. Bizdiń elimizde halyqaralyq dodalardyń ótkizilýi de ábden múmkin. Biz osy shahmattyń parasatty ekonomıkamyzdyń bolashaǵyn ashatyn jas urpaqty tárbıeleı alatyndyǵyna senemiz», - dedi Á.Isekeshev.
Bıylǵy týrnırge Qazaqstannyń barlyq aımaqtarynan 18 top jáne Reseıdiń Satka qalasynan «Vertıkal» atty jas shahmatshylar toby qatysýda. Olar 9, 13 jáne 17 jas sanattaryna bólinip, shahmattyń shveıtsarııalyq júıesi boıynsha ózara synǵa túsýde. Týrnırge qatysyp jatqan jas jetkinshekterdiń sany 170-ten asady.
