Astanada V halyqaralyq skrıpkashylar konkýrsy ótedi
ASTANA. QazAqparat - 2014 jylǵy qazan aıynyń 11 - 18 aralyǵynda Qazaqstan Respýblıkasy Mádenıet jáne aqparat mınıstrligi jáne Qazaq Ulttyq óner ýnıversıtetiniń uıymdastyrýymen Astana qalasynda Qazaq Ulttyq óner ýnıversıtetiniń Organ zalynda V halyqaralyq skrıpkashylar konkýrsy ótedi.
Bul týraly Qazaq Ulttyq óner ýnıversıtetiniń baspasóz qyzmeti habarlady.
V Halyqaralyq skrıpkashylar konkýrsynyń basty maqsaty - klassıkalyq mýzykany dáripteý, skrıpka ónerin nasıhattaý, qazaqstandyq jas talantty skrıpkashylardy joǵary deńgeıge kóterý jáne Qazaqstannyń mádenı abyroıyn arttyrý.
Konkýrsqa - Qazaqstan jáne shetel skrıpkashylary, arnaıy oqý oryndarynyń tárbıelenýshileri qatysady. Qatysýshylar jas shamasyna qaraı eki topqa bólinedi: jetkinshekter toby (15 jasqa deıingi) jáne eresekter toby (16 - 28 jas aralyǵy).
Qatysýshylar I.S.Bah, N. Paganını, I. Brams, P. Chaıkovskıı, D. Shostakovıch syndy uly kompozıtorlardyń shyǵarmalaryn oryndaıdy.
Konkýrs qazannyń 12 kúni saǵat 17.00-de Qazaq Ulttyq óner ýnıversıtetiniń Organ zalynda bastalyp, 17 kúni saǵat 19.00-de konkýrs jeńimpazdarynyń saltanatty gala-kontsertimen aıaqtalady.
Konkýrstyń qazylar alqasy quramynda belgili jáne ataqty skrıpkashylar - Qazaqstan Respýblıkasynyń halyq ártisi, professor Aıman Musaqojaeva, Edýard Grach (Reseı), Sergeı Kravchenko (Reseı), Aleksandr Vınnıtskıı (Fınlıandııa), Petr Sheremetev (Frantsııa) bar.
