Astanada V halyqaralyq «Astana - Mereı» jas oryndaýshylar baıqaýy bastaldy

dep habarlaıdy QazAqparat.

Mádenı is-sharany uıymdastyrýshylardyń aıtýynsha, baıqaýǵa Qazaqstan, Ózbekstan, Qyrǵyzstan jáne Reseıden 286 jas oryndaýshy qatysady. Olar konkýrstyń erejesine sáıkes, jas erekshelikterine qaraı 3 topta óner kórsetedi. Atap  aıtqanda, birinshi topta 12 jasqa deıingi, ekinshi topta 13-14 jas aralyǵyndaǵy, al sońǵy topta 15-16 jastaǵy ónerpazdar baq synaıdy. QR Bilim jáne ǵylym mınıstrligimen belgilengen erejege oraı «Baıan-akkordeon», «Úrlemeli jáne soqpaly aspaptar» jáne «Halyq aspaptary» atalymy boıynsha jeńimpazdar marapattalady.

«Osymen besinshi ret ótkizilgeli otyrǵan bul óner saıysynyń mártebesi jyl saıyn artyp keledi. Oǵan aǵymdaǵy jyly baıqaýǵa qatysýǵa nıet bildirgen jas oryndaýshylar sanynyń kóbeıýi jáne birqatar shet elderden qatysýǵa nıet bildirýshilerdiń bolýy naqty  dálel bola alady. Jalpy konkýrstyń negizgi maqsaty - mýzyka óneri salasyndaǵy daryndy, qabiletti oqýshylardy anyqtaý, olarǵa jaǵdaı jasaý», deıdi Qazaq ulttyq mýzyka akademııasy orkestrlik fakýltetiniń dekany, dotsent Sansyzbaı Orazalıev.

Jeltoqsannyń 11-ine deıin jalǵasatyn konkýrsty QR Bilim jáne ǵylym mınıstrligi, «Daryn» respýblıkalyq ǵylymı-tájirıbelik ortalyǵy jáne Qazaq ulttyq mýzyka akademııasy uıymdastyryp otyr.