Astanada «Úzdik ustaz» jobasy bastalady
ASTANA. KAZINFORM – Astana qalasy ákimdiginiń Ádistemelik ortalyǵy «Úzdik ustaz» jobasyn júzege asyrýdy bastaıdy.
Jobanyń basty maqsaty – pedagog mártebesin keńinen nasıhattaý, pedagogıkalyq mamandyqqa degen qoǵamdyq qurmetti arttyrý jáne tájirıbe almasýǵa, ınnovatsııalardy engizýge, ustazdardyń kásibı motıvatsııasyn nyǵaıtýǵa arnalǵan ǵylymı-ádistemelik alań qurý.
Qazirgi pedagogıka jáne áleýmettaný salasyndaǵy zertteýler kórsetkendeı, pedagogterdiń áleýmettik mártebesi bilim sapasyna, yntasyna jáne qoǵamnyń bilim berý júıesine degen senimine tikeleı áser etedi. Muǵalim eńbegin moıyndaý jáne olardyń medıakeńistikte belsendi kórinýi ınnovatsııalyq tájirıbelerdiń taralýyna, kásibı qaýymdastyqtyń nyǵaıýyna jáne bilimniń qoǵamdaǵy róli týraly turaqty qoǵamdyq dıalogtyń qalyptasýyna yqpal etedi.
Joba maqsaty - muǵalim mártebesin dáripteý, pedagogıkalyq kásibke degen qoǵamdyq qurmetti arttyrý, sondaı-aq pedagogterdiń tájirıbe almasýyna, ınnovatsııalardy engizýine jáne kásibı motıvatsııasyn nyǵaıtýyna múmkindik beretin ǵylymı-ádistemelik platforma qalyptastyrý.
Pedagog qoǵamnyń strategııalyq resýrsy, ol ǵylymnyń, mádenıettiń jáne ekonomıkanyń bolashaǵyn aıqyndaıtyn urpaqty tárbıeleıdi.
«Úzdik ustaz» jobasy elordalyq pedagogtardyń úzdik tájirıbeleri men jetistikterin biriktirip, ǵylymı-ádistemelik platforma retinde qyzmet atqarady.
Joba aıasynda maqalalar men suhbattar jarııalanady, ustazdardyń jańa ádistemelik tásilderi men quraldarymen bólisetin podkasttar daıyndalady, sondaı-aq teledıdar men onlaın resýrstarda medıalyq qoldaý kórsetiledi.
Astana qalasy ákimdiginiń Ádistemelik ortalyǵy telearnalar men medıaseriktesterdi yntymaqtastyqqa shaqyrady. Yntymaqtastyq formaty retinde birlesken reportajdar men telebaǵdarlamalar, ustazdardyń qatysýymen suhbattar men tok-shoýlar, telearnalardyń saıttary men áleýmettik jelilerinde materıaldardy jarııalaý, tikeleı efırler men onlaın pikirtalastardy uıymdastyrý, sondaı-aq jobamen baılanysty is-sharalarǵa aqparattyq qoldaý qarastyrylǵan.
Jobadan kútiletin nátıjeler: muǵalim mamandyǵynyń bedelin arttyrý, qoǵamnyń bilim berý júıesine senimin kúsheıtý, pedagogıkalyq qaýymdastyqtyń ınnovatsııalyq tájirıbelerin keńinen taratý, ustazdardyń kásibı yntasyn arttyrý jáne bilim berý salasynyń medıakeńistiktegi yqpalyn kúsheıtý.
«Úzdik ustaz» – pedagogterdiń eńbegin moıyndaýǵa, olardyń qoǵamdaǵy rólin nyǵaıtýǵa jáne ustazdy qoǵam damýynyń strategııalyq tulǵasy retinde qalyptastyrýǵa baǵyttalǵan alań.
Aıta keteıik, Oksfordta qazaq tilinen bilim alatyn stýdentter el tarıhy men mádenıetin qazaqtardyń ózinen artyq biledi. Bul týraly álemdegi eń kóne ýnıversıtette sabaq beretin muǵalim Dıdar Sadyq aıtty.