Astanada úzdik florıster baq synady
ASTANA. KAZINFORM — Astana qalasy Jastar saıasaty máseleleri basqarmasynyń qoldaýymen Jumysshy mamandyqtar jyly aıasynda Servıs jáne týrızm kolledjinde «Úzdik florıst-2025» baıqaýy ótti, dep habarlaıdy qala ákimdiginiń resmı saıty.
Baıqaý barysynda jas florıster naǵyz óner týyndysyna aınalatyn erekshe gúl kompozıtsııalaryn jasady. Biri klassıkalyq stılde názik gúl shoqtaryn túıse, endi biri tabıǵı elementterdi utymdy qoldana otyryp, kreatıvti art-obektiler jasady. Keıbir jumystar tipti «gúlge jan bitkendeı» áser qaldyryp, sheberler óz qııal keńistiginiń sheksiz ekenin kórsetti. Al, myń boıaýly gúlderden órnek toqyp, túıin túıgen stýdentterdiń shyǵarmashylyq jumysyn tájirıbeli florıster men bilikti ustazdar baǵalady.
Al uıymdastyrýshylar sharanyń basty maqsaty da shyǵarmashylyq adamdaryna erkindik ǵana syılap qoımaı, olardyń jumysyn nasıhattaý ekenin atap ótti.
— Bul baıqaý qoldanbaly baǵyttaǵy mamandardyń bedelin arttyrýǵa jáne olardyń shyǵarmashylyq áleýetin damytýǵa baǵyttalǵan is-sharalar serııasynyń jalǵasy. Biz Jumysshy mamandyqtar jylyna oraı túrli salalar boıynsha konkýrstar uıymdastyrdyq. Sol baıqaýlardyń barlyǵy aıaqtalǵannan keıin jyl sońyna qaraı jeńimpazdardy saltanatty túrde marapattaıtyn bolamyz. Ári jumysshy mamandyqtar jylyn dáripteý maqsatynda jstar arasynda osyndaı is sharalardyń uıymdastyrylýy olarǵa degen qurmet jáne olardyń eńbegin baǵalaý sanalady, — dedi «Astana jastary» jastar resýrstyq ortalyǵynyń jastarmen tárbıe jumysy jáne quqyq buzýshylyqtyń aldyn alý bóliminiń basshysy Araılym Saparáli.
Osyǵan deıin Astanada «Úzdik-2025» jobasy aıasynda qalalyq «Úzdik shashtaraz» baıqaýy ótkenin jazǵanbyz.