Astanada úzdik jýrnalıster marapattaldy

ASTANA. QazAqparat - Astanada «Qazaqstan Táýelsizdigi jáne Elbasy» atty shyǵarmashylyq konkýrstyń jeńimpazdary marapattaldy, dep xabarlaıdy QazAqparat tilshisi.

Bıylǵy baıqaýǵa eldiń túkpir-túkpirinen 564 jumys tústi. Konkýrsqa barlyǵy 120-dan astam buqaralyq aqparat quraldarynyń ókilderi qatysty. Olardyń ishinde sheteldik jýrnalıster de bar.

«Sondyqtan komıssııa músheleri baıqaýǵa xalyqaralyq mártebe berýdi biraýyzdan qoldady. Endi, sheteldik jýrnalıster "Sheteldik BAQ-taǵy úzdik jarııalanym» atty xalyqaralyq nomınatsııaǵa qatysa alady", - dedi QR Parlament Senatynyń depýtaty Darıǵa Nazarbaeva.

Qazylar alqasynyń sheshimi boıynsha «Úzdik televızııalyq materıal» atalymynda «Qazaqstan» arnasynyń tilshisi Erjan Qalymbaı birinshi orynǵa ıe boldy. Ekinshi orynda - Aleksandr Dremov (Óskemen qalasynyń teleagenttigi), al úshinshi oryndy Sánııa Kópjasarova («Qazaqstan» TRK, Kókshetaý) ıelendi.

«El júregi - Astana» atalymynda Prezıdenttiń teleradıokesheniniń qyzmetkeri Berik Ábishev úzdik dep tanyldy. Azamat Tilepov («Qazaq radıolary» JShS) ekinshi orynda, al Aıgúl Áljaqsına («Vechernıaıa Astana» gazeti) úshinshi oryndy qanaǵat tutty.

«Ǵalamtordaǵy úzdik jarııalanym» atalymynda «Elorda aqparattyń» tilshisi Aınur Shoshaeva birinshi oryndy jeńip aldy. Al Arman Súleımenov («Qazkontent» AQ, «Qazaqstan tarıxy» saıty) pen Irına Plotnıkova («Regıon» baspa úıi, Óskemen) ekinshi jáne úshinshi orynnan kórindi.

«Úzdik radıomaterıal» atalymynda «Qazaq radıolary» JShS tilshisi Janat Januzaqovtyń jumysy úzdik dep tanyldy. Onyń áriptesi Baqytjan Jarmuxambetov ekinshi orynǵa ıe bolsa, «Astana» radıosynyń dıktory Olga Asxojına úshinshi orynnan kórindi.

Budan bólek, «Gazetter men jýrnaldardaǵy úzdik materıal» atalymynda úzdik úshtik marapattaldy. «Kazaxstanskaıa pravda» gazetiniń tilshisi Anastasııa Prılepskaıa birinshi oryndy jeńip aldy. «Túrkistan» gazetiniń jýrnalısi Dınara Myńjasarqyzy ekinshi orynǵa, al «Egemen Qazaqstan» gazetiniń tilshisi Joldybaı Bazar úshinshi orynǵa ıe boldy. 

Aıta keteıik, birinshi orynǵa 1 mıllıon teńge kólemindegi syıaqy tabystalsa, ekinshi orynǵa - 500 myń, al úshinshi orynǵa 200 myń teńge berildi. Barlyq jeńimpazdarǵa arnaıy tósbelgiler tapsyryldy.