Astanada úzdik sportshylar marapattaldy

«Jyldan jylǵa Astanada sportpen shuǵyldanyp, salaýatty ómir saltyn ustanatyndar sany artyp keledi. Búginde 300 myńǵa jýyq astanalyq turaqty túrde sportpen aınalysady. Barshańyzǵa alǵys aıtamyn! Sizder qoǵamnyń ıgiligi úshin eńbek etip júrsizder, myqty, deni saý jastardy tárbıelep júrsizder» - dedi qala ákiminiń orynbasary Ermek Amanshaev.

Aıta keteıik, búginde Astana qalasynyń 10 balalar-jasóspirimder sport mektebinde 7416 bala bilim alýda, onyń ishinde 6586 - olımpıadalyq sport túrinen, 830 - olımpıadalyq emes sport túrinen. Sport mektepterinde 50 sport túrinen sportshylar daıyndaıdy, sonyń ishinde 39 - olımpıadalyq, 11 - olımpıadalyq emes jáne ulttyq sport túrleri.

«2018 jyldyń І jartyjyldyǵynda respýblıkalyq jáne halyqaralyq jarystarda elordalyq sportshylar 2,5 myńnan astam medal oljalady. Sonymen qatar 91 sportshy «Sport sheberi», 331 - «Sport sheberine kandıdat» ataǵyn ıelendi, 235 - «I razrıad» aldy. Atalǵan kezeńde elordalyq sportshylar qalalyq, respýblıkalyq jáne halyqaralyq deńgeılerdegi 1133 sporttyq sharaǵa qatysty», - dep naqtylady E. Amanshaev.

Jyl basynan beri Astanada 300 jýyq sporttyq-buqaralyq shara ótkizildi, onyń ishinde 43 - halyqaralyq, 47 - respýblıkalyq jáne 200 astam qalalyq shara.

Qalalyq qurama jazǵy jáne qysqy sport túrlerinen respýblıkalyq keshendi jarystarda kósh bastap keledi. Onyń ústine, Astana qalasynyń sport mektepteri Qazaqstan Respýblıkasynyń ulttyq quramalaryn jasaqtaýda basty donor bolyp tabylady. Elordalyq bapkerler 20 jýyq Olımpıada chempıony men júldegerlerin tárbıelep shyǵardy, onyń ishinde Danııar Eleýsinov, Vasılıı Levıt, Gıýzel Manıýrova, Marına Volnova, Sergeı ıAshkın, Ashat Jitkeev jáne basqalary bar.

Statıstıkalyq málimetterge sáıkes, 2017 jyldyń qorytyndysy boıynsha qalada 671 sport ǵımaraty bar. Elordany Astanaǵa aýystyrǵaly qalada halyqaralyq standarttarǵa saı jańa biregeı nysandar boı kóterdi.