Astanada úzdik sáýlettik jobalar anyqtaldy
ASTANA. QazAqparat - Astanada BI GROUP ARCHITECT AWARDS birinshi halyqaralyq sáýlet baıqaýynyń jeńimpazdary marapattaldy, dep habarlaıdy QazAqparat tilshisi.
Baıqaý qatysýshylary Qazaqstannyń túrli qalalary úshin mádenıet, densaýlyq saqtaý, bilim berý jáne sport salalary boıynsha daıyn sheshimder usynýy tıis bolatyn. Onda Reseı, Ýkraına, Lıtva jáne Qazaqstannan kelgen 20 jas sáýletshi óz jobalaryn qorǵady.
Baıqaý nátıjesinde Mádenıet nomınatsııasy boıynsha birinshi oryndy almatylyq Rıshat Ańsar jeńip aldy. Ol kópfýnktsııaly kontserttik zal jobasyn usynǵan.
«Men usynǵan joba Almatyda óte ózekti. Sebebi, Almaty - jastardyń qalasy. Jastardyń damýyna múmkindik bergende ǵana elimiz damı túsedi dep esepteımin. Men 1200 jáne 500 oryndyq eki zaly bar jáne ashyq aspan astynda amfıteatry bar zamanaýı kontsert zaly jobasyn usyndym. Ony bezendirýde de jastardyń ózin erkin sezinetin atmosferasyn jasaǵym keldi. Munda kontsert qana emes, túrli forýmdar, ádebıet keshterin ótkizýge bolady. Ǵımarattyń mýltımedıalyq ıntereri sýretshiler men fotosýretshilerdiń kórmelerin ótkizýge múmkindik beredi. Ǵımarat qasbetin shynydan jasap, Almatynyń taýlarynyń ásem kórinisin tamashalaýǵa bolady», - dep túsindirdi Ańsar Rıshat jeńimpazdardy marapattaý rásiminde.
Atalymdaǵy ekinshi oryn - Qarttarǵa arnalǵan áleýmettik-mádenı ortalyq jobasy úshin Janar Bekturǵanovaǵa berilse, úshinshi oryndy Irına Gavrılchenko (Nemis teatry) men ýkraınalyq Valerıı Gydeı (Jel mýzeıi) jeńip aldy.
Densaýlyq saqtaý atalymynda jalǵyz qatysýshy fınalǵa jetti. Onda kópfýnktsııaly saýyqtyrý kesheni jobasy úshin Denıs Shýrygın marapattaldy.
Bilim berý sanatynda reseılik Alına Krıvosheınanyń «Shekteýsiz» atty jalpy bilim berý mektebi jobasy úzdik atandy. Bul mektepte qalypty jáne múmkindigi shekteýli balalardyń qatar oqýyna jaǵdaı jasalmaq. Ekinshi oryn - qazaqstandyq Sábına Hamzınanyń «Stýdent-hab» jobasyna, úshinshi oryn - Saıagúl Qaıyrbekovanyń «Stýdentter qalashyǵy» jobasyna berildi.
Sport nomınatsııasy boıynsha birinshi oryn - biregeı sporttyq ortalyq avtory ýkraınalyq Evgenııa Vasılovskaıaǵa berildi. Ekinshi oryndy - kópfýnktsııaly sport kesheniniń avtory Elaman Amantaev, úshinshi oryndy - jabyq velojoly bar sporttyq ortalyq jobasy úshin Serik Toqaev ıelendi.
Birinshi oryn jeńimpazdary 15 myń dollarǵa aqshalaı sertıfıkat, BI Group qurylys holdınginiń jobaǵa tapsyrysy jáne Eýropanyń jetekshi oqý oryndarynyń birinde profıldi kýrstardan ótýge joldama aldy. ІІ oryn úshin 10 myń dollar aqshalaı sertıfıkat jáne BI Group qurylys holdınginiń jobaǵa tapsyrysy qarastyrylǵan. Al ІІІ oryn ıegeri 5 myń dollarǵa aqshalaı sertıfıkat aldy.
«Bul BI Group kompanııasynyń alǵashqy baıqaýy. Oǵan álemniń 15 memleketinen 350-den astam jumys kelip tústi. Munda mektep, aýrýhana, balabaqsha, sporttyq ortalyq syndy halyqqa qajet áleýmettik jobalarǵa erekshe basymdyq berildi jáne eń úzdik 20 joba iriktelip alyndy. Jobalardyń biregeıligi men jalpy jumys sapasyna mán berdik. Ideıalardyń shynaıylyǵy da aýqymdy rólge ıe boldy, ıaǵnı turǵyzý bolatyn ǵımarattar ıdeıasyn tańdadyq. Jeńimpazdardyń ǵana emes, 20 úzdik qatysýshynyń jobalaryn júzege asyrýǵa bar kúshimizdi salamyz», - dedi BI Group kompanııasynyń Bıznesti damytý boıynsha atqarýshy dırektory Aıan Zikirın.
