Astanada úzdik santehnık, aýla sypyrýshy jáne eden jýýshylar anyqtalady

NUR-SULTAN. QazAqparat - Elordada úzdik páter ıeleri kooperatıvin anyqtaýǵa arnalǵan baıqaý jarııalandy, dep habarlaıdy QazAqparat Elorda Info saıtyna silteme jasap.

Baıqaýdy Baıqońyr aýdanynyń Páter ıeleri kooperatıvi qaýymdastyǵy aýdan ákimdigi apparatynyń qoldaýymen ótkizýde. Onyń barysynda úzdik elektrık, santehnık, aýla sypyrýshy jáne eden jýýshylar da anyqtalatyn bolady.

Konkýrsqa qatysýǵa ótinimder 15 naýryz ben 30 sáýir aralyǵynda qabyldanady. Nomınatsııalary: «Úzdik PIK», «Úzdik PIK tóraǵasy», «Úzdik santehnık», «Úzdik aýla sypyrýshy», «Úzdik eden jýýshy».

«Baıqaý turǵyn úı qoryn kútip ustaý jáne aýla aýmaqtaryn abattandyrý boıynsha barynsha adal qyzmet kórsetetin uıymdardy anyqtaýǵa baǵyttalǵan. Baıqaýǵa Nur-Sultan qalasynyń Baıqońyr aýdany sheginde qyzmet kórsetetin uıymdar qatysýǵa quqyly», - delingen aýdan ákimdiginiń habarlamasynda.

Júldeli oryndar úshin syıaqy mólsheri men túrin Baıqońyr aýdanynyń PIK qaýymdastyǵy basqarma músheleri jáne aýdan ákiminiń apparaty anyqtaıdy.