Astanada úzdik energetıkter marapattaldy
ASTANA. QazAqparat - Qazaqstanda jeltoqsan aıynyń árbir úshinshi jeksenbisinde Energetıkter kúni atalyp ótiledi. Búgin elordalyq iri kásiporyndardyń biri - «Astana-REK» AQ ǵımaratynda energetıka salasynyń úzdikterin marapattaý saltanaty ótti.
Merekelik sharaǵa Astana qalasy ákiminiń orynbasary Qosman Aıtmuhametov, QR Parlamenti Senatynyń depýtaty Serik Jaqsybekov, Astana qalasy Energetıka basqarmasynyń basshysy Qaırat Ábdirasylov, «Astana-REK» AQ basshylyǵy, atalmysh sala qyzmetkerleri men ardagerleri qatysty, dep habarlaıdy qala ákimdiginiń baspasóz qyzmetinen. Shara barysynda qurmetti energetıkterge Astana qalasy ákiminiń atynan quttyqtaý gramotalary, 10 mamanǵa Qazaqstan elektr energetıkasy qaýymdastyǵynyń nagradalary, sonymen qatar birqatar qyzmetkerge «Astanaenergoservıs» AQ qurmet gramotalary tabystaldy. Budan basqa, sharanyń resmı bóliginde «Astana-REK» AQ 50 qyzmetkeri kásibıligi, adal ári kópjyldyq eńbegi úshin gramotalarmen marapattaldy. Sharanyń saltanatty bóliginen keıin kópshilik nazaryna merekelik kontsert usynyldy. Ulttyq mýzyka oınalyp, myń buralǵan bıshiler óz ónerlerin ortaǵa saldy.
