Astanada úzdik áleýmettik jobalardyń kórmesi ashyldy
ASTANA. QazAqparat - Búgin Astanada úzdik áleýmettik jobalardyń V Respýblıkalyq kórmesi ashyldy. Atalǵan sharanyń ashylý rásimine Zeınetaqy jáne áleýmettik qamsyzdandyrý boıynsha halyqaralyq qaýymdastyqtyń Bas xatshysy Hans-Horst Konkolevskıdiń ózi qatysty, dep xabarlaıdy QazAqparat tilshisi.
Aıta ketken jón, bıyl barlyq aımaqtardan 20 úzdik áleýmettik joba irikteldi. Osy oraıda múmkindigi shekteýli azamattardy ońaltý, qıyn ómirlik jaǵdaıǵa tap bolǵandarǵa kómek berý, arnaýly áleýmettik qyzmetter kórsetý, jumysqa ornalastyrý jáne taǵy basqa mańyzdy baǵyttarǵa basa nazar aýdaryldy.
QR Eńbek jáne xalyqty áleýmettik qorǵaý mınıstri Tamara Dúısenovanyń aıtýynsha, osy ispetti sharalardyń arqasynda naqty áleýmettik kómekti anyqtaýǵa múmkindik bar. Sonyń nátıjesinde bıýdjet qarjysy da tıimdi jumsalady. "Bıylǵy kórmede tek osy jyldyń jeńimpazdary ǵana emes, sońǵy bes jylda qolǵa alynǵan jobalar da bar. Sol sebepti biz bes jyldyq jumystyń dınamıkasyn - árbir jobanyń qalaı iske asqanyn, xalyqqa ne bergenin jáne onyń nátıjesin kóre alamyz", - deıdi Tamara Qasymqyzy.
Al Zeınetaqy jáne áleýmettik qamsyzdandyrý boıynsha halyqaralyq qaýymdastyqtyń Bas xatshysy Hans-Horst Konkolevskı Qazaqstannyń osy saladaǵy jumysyn joǵary baǵalap, úzdik áleýmettik jobalardyń avtorlarymen jeke tanysýǵa nıetti ekenin jetkizdi. "Sizder qazaqstandyq qoǵamnyń damýyna úlken úles qosyp kelesizder. Myń da bir alǵys! Úzdik áleýmettik jobalarǵa arnalǵan osynaý iri kórmeniń ótýimen sizderdi shyn júrekten quttyqtaımyn", - dep atap kórsetti Konkolevskı.
Jalpy, sońǵy bes jyldyń ishinde úzdik áleýmettik jobalar baıqaýyna 650 ótinish túsken. Sonyń ishinde 114 joba jeńimpazdardyń qatarynan kórindi. Osy sanattaǵy bastamalarǵa memlekettik tapsyrystar men granttar berilip, qarjylaı qoldaý jasaldy. Bıyl aımaqtar arasynda iriktelgen 20 úzdik jobanyń ishinen úsheýi respýblıkalyq deńgeıde jeńimpaz atanady. Onyń qorytyndysy búgin keshke qaraı jarııalanady.
