Astanada Uzaq batyr men Jámeńke abyzǵa arnap eskertkish ornatylsa ıgi - Ǵ. Esim
ASTANA. Maýsymnyń 10-y. QazAqparat /Qanat Mámetqazyuly/ - Elimizdiń rýhanı júregi Astananyń jańa kósheleriniń birine Uzaq batyr men Jámeńke abyzdyń esimderin berip, eskertkish ornatý týraly sheshim qabyldansa ıgi. Búgin bul týraly QR Parlamenti Senatynyń jalpy otyrysynda depýtat Ǵarıfolla Esim QR Premer-Mınıstri Kárim Másimovke joldaǵan saýalynda málim etti.
«Qazaq ádebıetiniń klassıgi Muhtar Áýezov 1927 jyly Jetisý óńirindegi Qarqarada 1916 jyly oryn alǵan ult-azattyq kóterilisi týraly «Qıly zaman» atty povesin jazdy. Álem ádebıetiniń altyn jaýharlary sanalatyn bul shyǵarmanyń jaryq kórýine keńestik totalıtarlyq qoǵam múmkindik bermedi. Kózi tiri kezinde búkil álem ulyqtaǵan Muhtar Áýezov atalmysh shyǵarmasynyń tusaýkeserin kóre almaı ketti. «Qıly zaman» tek 1972 jyly «Novyı mır» jýrnalynyń altynshy sanynda «Lıhaıa godına» degen atpen, álemdik ádebıettiń klassıgi Shyńǵys Aıtmatovtyń alǵysózimen qyryq tórt jyldan keıin jaryq kórdi. «Qıly zamanda» qazaq halqynyń basynan ótken, el jadynda qattalyp, búginge deıin saqtalyp kele jatqan qandy qyrǵyn baıandalǵan. Bul ult-azattyq kóterilistiń qaharmandary - Uzaq batyr men Jámeńke abyz edi. Birinshisi qol bastaǵan batyr bolsa, ekinshisi el bastaǵan sheshen bolatyn. Olardyń tikeleı urpaqtary búginde aramyzda júr», dedi Ǵ. Esim.
Sonymen qatar, senator Qazaq eliniń táýelsizdiginiń jıyrma jyldyǵyna oraı, 1916 jylǵy ult-azattyq kóteriliste qurban bolǵan Uzaq batyr men Jámeńke abyzdyń bolashaq urpaqtardyń jadynda saqtalyp qalýy úshin ulyqtaýdyń qajettigin aıtty. Bul rette, olardyń esimderin bir-birinen bólmeı, elimizdiń rýhanı júregi Astananyń jańa kósheleriniń birine berip, eskertkish ornatýdyń mańyzy zor ekendigine nazar aýdartty. «Mundaı sheshim qabyldansa, bul el tarıhynyń Uzaq pen Jámeńke sekildi halyq qaharmandarynyń aldyndaǵy paryzdy óteý ǵana emes, Muhtar Áýezovtiń tarıhı shyndyqty pash etken «Qıly zamanyna» jáne onyń tusaýyn kesken Shyńǵys Aıtmatovtyń bıik rýhyna qoıylǵan máńgilik eskertkish bolar edi», dedi senator.
