Astanada úıirme men sport sektsııasyna oryn bólý kezinde básekelestik zańnamasy buzylǵan
ASTANA. KAZINFORM — Básekelestikti qorǵaý jáne damytý agenttiginiń Astana qalasy boıynsha departamenti Astana qalasynyń dene shynyqtyrý jáne sport basqarmasy jáne qalalyq mádenıet basqarmasyna qatysty tergeýdi aıaqtady.
Nátıjesinde eki basqarmanyń áreketinen shyǵarmashylyq úıirmeler men sport sektsııalaryna oryn bólý kezinde Qazaqstannyń básekelestikti qorǵaý zańnamasyn buzý faktileri anyqtaldy.
Memlekettik shyǵarmashylyq jáne sporttyq tapsyrystardy № 120 jáne № 122 ornalastyrý qaǵıdalaryna sáıkes, memlekettik shyǵarmashylyq jáne sporttyq tapsyrystardy ornalastyrý algorıtmi aldymen qyzmet kórsetýshilerdi irikteýdi, sodan keıin oryndardy shyǵarmashylyq úıirmeler men sport sektsııalaryna bólýdi mindetteıdi.
Alaıda, 2023 jylǵy 27 qyrkúıekte Astana qalasy ákimdiginiń mádenıet jáne sport basqarmalary aldyn ala irikteýsiz buryn iriktelgen qyzmet kórsetýshilerge tegin úıirmeler men sektsııalarǵa barý úshin kezek ashqan.
Osylaısha mádenıet jáne sport basqarmalary joǵaryda atalǵan is-qımylymen memlekettik shyǵarmashylyq jáne sporttyq tapsyrystardy ornalastyrý tártibin saqtamaýyna baılanysty kásipkerlerdiń memlekettik tapsyrysqa qol jetkizýin shektegen.
Búgingi tańda Astana qalasynyń mamandandyrylǵan aýdanaralyq ákimshilik soty dene shynyqtyrý jáne sport, mádenıet basqarmalarynyń departament atyna túsirilgen ákimshilik talabyn qanaǵattandyrmady.
