Astanada úılerdi jylytý aldaǵy 3 jylda kúrdelene túsýi múmkin

ASTANA. QazAqparat – Jylytý maýsymynda elordada saǵatyna 350 gıgakalorııa jylý energııasynyń tapshylyǵy baıqalady. Ashyq talqyǵa shyǵarylǵan «Astana qalasynyń turǵyn úı qoryn renovatsııalaý jáne modernızatsııalaýdyń 2028 jylǵa deıingi memlekettik baǵdarlamasynda» osyndaı derekter keltirilgen, dep habarlaıdy QazAqparat tilshisi.

Qala saǵatyna 3,1 myń gıgakalorııa (Gkal) jylý energııasyn tutynady. Biraq Astanada saǵatyna nebári 2,7 myń Gkal jylý óndiriledi. Bul jylý 28 mln sharshy metr turǵyn jáne turǵyn emes alańdarǵa taraıdy. Sonda tapshylyq saǵatyna 350 Gkal-dy qurap otyr. Halyq sanynyń artý dınamıkasyn eskere otyryp, qalany qosymsha saǵatyna 1,5 myń Gkal jylý energııasymen qamtamasyz etetin gaz jylý stansasyn salý qajet, - delingen Ashyq NQA portalynda jarııalanǵan Astanadaǵy turǵyn úı qoryn renovatsııalaý jáne modernızatsııalaý baǵdarlamasynda.

Qujatta jazylǵandaı, tapshylyqqa shamadan tys salynyp jatqan turǵyn úıler sebep. Jyl saıyn elordada 3 mln sharshy metr baspana paıdalanýǵa beriledi. Tıisinshe ol ınjenerlik ınfraqurylymǵa júk túsirip, jylý, sý, elektr energııasy sııaqty resýrstardyń tapshylyǵyna ákeledi.

Taldaý kórsetkendeı, jylý júıeleriniń búgingi qýaty jyl saıyn paıdalanýǵa beriletin 2 mln sharshy metrden aspaıtyn (qazir jyl saıyn 3 mln sharshy metr) turǵyn úı qoryn jyltýǵa qaýqarly. Elordada jylý energııasynyń qazirgi tapshylyǵy saǵatyna 350 Gkal bolsa, onda aldaǵy 3 jylda tapshylyq saǵatyna 900 Gkal-ǵa jetýi múmkin, - dep mamandar jasaǵan boljam jazylǵan qujatta.

Qosa ketsek, buǵan deıin elordadaǵy turǵyn úı qoryn renovatsııalaý jáne modernızatsııalaý baǵdarlamasy aıasynda birneshe aýdandaǵy úılerdi taıaý arada súrý josparlanǵanyn jazyp edik.

Sonymen birge aldaǵy 3-5 jylda elorda aýmaǵyndaǵy turǵyn úı qyrylysynyń qarqynyn tómendetý usynyldy.