Astanada «Úılený toılary. Merekeler. 2011» kórmesi ashyldy

Kórmege Italııa, Ispanııa, Amerıka, Túrkııa jáne basqa da elderdiń brendtaryn usynatyn 60-tan astam kompanııa qatysýda. 14 sáýirge deıin munda qalyńdyqtyń betin árlep, shash úlgilerin jasaıtyn sheberlerdiń sabaqtaryn tamashalaýǵa, toıǵa jáne keshke arnalǵan kóılekterdiń aýktsıonyna qatysýǵa sondaı-aq, toı kortejderine, qalyńdyqtyń gúlshoqtaryna, fotosýretshiler men beıne operatorlarǵa tapsyrys berýge bolady. Kórme barysynda sonymen birge, jastarǵa arnap bı sabaqtary ótkizilip, bankettik zaldar men avtokólikterdi bezendirý úlgileri, merekelerdi ótkizýdiń jańa stsenarııleri usynylady. AHAJ qyzmetkerleri neke kelisimshartyn durys resimdeý boıynsha keńester berse, Astananyń toı salondary eń ádemi kóılekterdiń defılesin ótkizedi. Al áshekeılerdi unatatyn qyz-kelinshekter úshin zergerlik buıymdardyń mol tańdaýy usynylǵan.

Jobanyń jetekshisi Svetlana Mahatovanyń aıtýynsha, mundaı kórme ekinshi ret ótkizilip otyr. «Tutynýshy retinde qandaı da bir merekeni uıymdastyrý qıynǵa túsedi. Barlyq toı salondaryn, uıymdastyrý kompanııalaryn aralap shyǵýǵa týra keledi. Oǵan kóp ýaqytyń jáne kúshiń ketedi. Al kórmede barlyǵyn bir jerden tabýǵa bolady», - deıdi ol.

Onyń pikirinshe, Qazaqstanda toılardy uıymdastyrý kompanııalarynyń deńgeıi bara-bara artyp keledi. «Damyǵan dep aıta almasam da, aıtarlyqtaı salmaqty. Astanada ondaı 60-qa jýyq kompanııa bar. Solardyń tek 10-ynyń deńgeıi joǵary dep aıta alamyn jáne olar búgin kórmege qatysyp otyr», - dep atap ótti S.Mahatova.

Uıymdastyrýshylar aldaǵy ýaqytta kórmeni jylyna eki ret uıymdastyrýdy kózdep otyr. Eger kóktemde kıimder men áshekeılerdiń jańa úlgisi usynylatyn bolsa, kúzde eski toptamalardyń jappaı satylymy ótkiziledi.