Astanada uıqy kúre tamyryna ota jasaýdyń ınnovatsııalyq ádisi engizildi

Bul týraly astana.kz saıtyna elordalyq Densaýlyq saqtaý basqarmasynan habarlady. Bul ádis tarylǵan tamyrdyń sańylaýyna stent - karkas rólin atqaratyn tsılındr túrindegi jińishke sym konstrýktsııasyn ornatýǵa negizdelgen. Ol tor túrindegi arnaıy ınerttik qorytpalardan jasalady, uıqy kúre tamyrynyń ishinde túzetilip, jaqtaryn jazyp turady. 30-40 mınýtqa deıin jalǵasatyn operatsııa kezinde jergilikti anestezııa jasalady. Patsıentterdiń jaǵdaıy otadan keıin qanaǵattanarlyq bolsa, úsh táýlikten keıin aýrýhanadan shyǵarylady.

Budan basqa, №2 qalalyq aýrýhananyń bazasynda reseılik áriptestermen (Rostov na Doný q.) birlesip, ınterventsııalyq hırýrgtiń jetekshiligimen otadan keıingi asqynýlardyń aldyn alý úshin proksımaldy qorǵaýshy ballonmen «Uıqy kúre tamyryn stentteý» taqyrybynda sheberlik synyby ótkizildi. Shara aıasynda 5 ota sátti jasaldy.

Aıta keteıik, uıqy kúre tamyrynyń jaqtarynda túıindikterdiń qalyptasýynyń saldary aýyr bolady. Túıindikter - tromb týyndaǵan jáne kúre tamyr sańylaýy tolyqtaı bitelgen jerler, bul óz kezeginde bas-mı ınsýltyna jáne adamnyń ólimine soqtyrady.