Astanada úıine datchık qoıylǵan otbasy aman qaldy
ASTANA. QazAqparat - Oqys oqıǵa elordanyń «Kóktal-2» turǵyn úı jaıynda oryn aldy, dep habarlaıdy QazAqparat tilshisi Astana qalasy Tótenshe jaǵdaılar departamentine silteme jasap.
«Búgin túski 12 saǵat 15 mınýtta «112» qyzmetine jedel járdem stantsııasynan «Kóktal-2» turǵyn úı alaby, Aqmola kóshesi, 30 úı mekenjaıynda gaz ıisinen ýlaný oqıǵasy oryn alǵany týraly aqparat kelip tústi. Jedel járdem shaqyrǵan áıeldiń aıtýynsha oqıǵa túngi 02:00-de oryn alyp, datchık birden dabyl qaqqan jáne úı kók tútinge aınalǵan. Úsh balasymen úıde bolǵan ana gaz ıisin ketirip jeldetken soń qaıta uıyqtaǵan. Tańerteń eki balasyn mektepke jiberip, úshinshi balasymen (2009 jyly týǵan) úıde qalǵan áıel ózin jaısyz sezinip, júregi aınyp, basy aınalǵan», - delingen departament habarlamasynda.
Habarlamada aıtylǵandaı, saǵat 12:00-de jedel járdem brıgadasy anasy men balasyn aýrýhanaǵa jetkizdi. Tıisti tekseristen soń densaýlyqtaryna qaýip bolmaǵandyqtan ana men balany úılerine jiberdi.
«Dárigerler anasy men balasynyń qazirgi densaýlyǵyna qatysty qanaǵattanarlyq degen baǵa berdi. Oqıǵa oryn alǵan úıge datchık aqpan aıynda júrgizilgen órt qaýipsizdigine qarsy túsindirme jumysy kezinde qoıyldy», - dep habarlaıdy Tótenshe jaǵdaı departamenti.
