Astanada úıindi astynan qutqarylǵandardyń densaýlyǵyna qatysty túsinik berildi
ASTANA. QazAqparat - Astana qalalyq qoǵamdyq densaýlyq saqtaý basqarmasy úıindi astynan qutqarylǵandardyń densaýlyǵyna qatysty túsinik berdi, dep habarlaıdy QazAqparat tilshisi.
«Keshe, 1 tamyz kúni saǵat 19:55-de jedel járdem pýnktine Balqantaý kóshesindegi salynyp jatqan úı qurylysynyń qulaýynyń saldarynan zardap shekkender bar degen qońyraý tústi. Oqıǵa ornyna shuǵyl jetken jedel járdem jaraqat alǵan úsh jumysshyny qalalyq №1 aýrýhanaǵa jetkizdi. Qazirgi tańda zardap shekkenderdiń densaýlyǵy ortasha, turaqty dep aıtýǵa bolady. Medıtsınalyq kómek kórsetildi. Úsheýi de aýrýhananyń beıindi bóliminde em alyp jatyr», - dedi Astana qalalyq qoǵamdyq densaýlyq saqtaý basqarmasynyń baspasóz hatshysy Aıgerim Ardaq.
Aıta keteıik, 1 tamyz kúni saǵat 19-55-te Astana qalasy Almaty aýdanyndaǵy Balqantaý, 171 mekenjaıynda turǵyzylyp jatqan qos qabatty kottedjdiń birinshi jáne ekinshi qabatyn jalǵap turǵan eden jabyny opyrylyp qulap túsken. Saldarynan úsh jumysshy úıindi astynda qalyp qoıǵan. Qutqarýshylar 1970 jylǵy jáne 1983 jylǵy azamattardy úıindi astynan qazyp aldy. Ekeýi de aman. Sosyn úshinshi jumysshy da qutqaryldy. Zardap shekkender tez arada aýrýhanaǵa jetkizilgen bolatyn.
