Astanada uıaly telefon satatyn saýda núkteleri tekserildi
ASTANA. QazAqparat - Astana polıtsııasy urlanǵan 6 jáne joǵalǵan 3 uıaly telefondy ıelerine qaıtardy, dep habarlaıdy QazAqparat qalalyq ІІD baspasóz qyzmetine silteme jasap.
«12 qazanda polıtseıler urlanǵan zattar satylýy yqtımal oryndarda reıd júrgizdi. Bul turǵyda «Artem» saýda úıiniń aýmaǵynda uıaly telefondar satylatyn jáne jóndeletin oryndar tekserildi. Bul shara telefon, planshet jáne noýtbýkterdiń urlyǵyna tosqaýyl qoıý úshin qabyldanatyn jumystardyń tıimdiligin arttyrý maqsatynda uıymdastyryldy», - delingen taratylǵan habarlamada.
Belgili bolǵandaı, reıd barysynda polıtseıler 144 býtıkti tekserdi, onyń ishinde 75 jóndeý sheberhanasy bar. Shara barysynda tıisti qujaty joq segiz júzge jýyq gadjetter men olardy jóndeýge arnalǵan bólshekter anyqtaldy.
Sonymen qatar, urlanǵan 6 jáne joǵalǵan 3 uıaly telefon ıelerine qaıtaryldy. Munymen qosa, tıisti ýaǵdalastyqtarǵa sáıkes, telefondar men gadjetterdiń IMEI- kodtaryn polıtseıler tekserý úshin jaqyn shetelderge jiberedi. Osy oraıda Qyrǵyzstan, Reseı, Ózbekstan jáne basqa elder qamtylady.
«Atap aıtqanda, uıymdastyrylǵan aldyn alý sharasy barysynda atalǵan taýarlardy satýshylar tarapynan durys túsinistik boldy. Sáıkesinshe, tekserý kezinde polıtseılerge qatysty olar eshqandaı eskertý jasamady», - dep atap ótilgen habarlamada.
