Astanada úı qurylysyna berilgen jerler qaıta qaralyp, saıabaq salynady
«Jalpy, qazir qala boıynsha turǵyn úıge bólingen barlyq ýchaskeler qaıta qaralýda. Biz qazir olardy kógaldandyrý, saıabaq klasterlerin, áleýmettik nysandardy ulǵaıtý úshin qaıta qarastyryp jatyrmyz. Sondaı-aq, tujyrymdamamyzda kóshelerdi jáne qosymsha aǵash otyrǵyzýǵa bolatyn barlyq ýchaskelerdi barynsha kógaldandyrýdy qarastyramyz», - dedi Aslan Qandyǵulov Astana kommýnıkatsııalar qyzmetinde ótken brıfıngte.
Aıta keteıik, sońǵy bes jylda Astanada abattandyrý boıynsha myńnan astam joba iske asyrylǵan, onyń ishinde 181 qoǵamdyq keńistik pen 873 aýla salynǵan. Bıyl qalanyń bes aýdanynda 165-ten astam aýla abattandyrylýda.
«Biz elordalyq sáýletshiler retinde bul saıabaqtar turǵyndardyń qala qarbalasynan úzilis alatyn súıikti ornyna aınalaryna senimdimiz. Eskızdik jobalardy ázirleý kezinde turǵyndardyń tilekteri men syndary eskeriledi. Sonymen qatar, ýrbanıster álemdegi eń jaqsy tájirıbelerdi qoldanady. Mysaly, qalada velojoldar sany artyp keledi, bul bolashaqta kóshelerdegi kólik quraldarynyń sanyn azaıtýǵa jáne kómirqyshqyl gazynyń shyǵaryndylaryn azaıtýǵa múmkindik beredi», - dep tolyqtyrdy spıker.
Buǵan deıin Aslan Qandyǵulov Astananyń qaı kósheleri abattandyrylatynyn baıandaǵan edi.