Astanada úı ıeleriniń quny 1 mln teńgelik altyn buıymdaryn urlaǵan qyzmetshi áıel ustaldy
ASTANA. 31 qazan. QazAqparat - Astanada óziniń jumys berýshilerin shamamen 1 mıllıon teńgege tonaǵan áıel ustaldy,
dep habarlady elordanyń ІІD baspasóz qyzmetinen.
Polıtsııaǵa 32 jastaǵy Astana turǵyny aryzdanyp, belgisiz bireýlerdiń onyń jeke zattaryn (altyn buıymdaryn) urlap ketkenin aıtqan.
«Almaty» aýdany ІІB qyzmetkerleri júrgizgen jedel izdeý sharalarynyń barysynda 40 jastaǵy Ońtústik Qazaqstan oblysynyń turǵyny ustaldy. Ol zardap shekken adamnyń úıinde qyzmetshi bolǵan.
Úsh aı boıy jumys istegen áıelge úı ıeleri eńbegine oraı tıisti aqshasyn tólep otyrǵan. Degenmen olar altyn buıymdardyń joǵala bastaǵanyn ańǵarǵan. Alaıda oǵan asa nazar aýdarmaǵan. Qymbat altyn saǵattar joǵalǵannan keıin ǵana polıtsııaǵa barǵan.
Ustalǵan áıel birinshi tergeýde-aq jalpy quny 942 myń teńge bolatyn altyn buıymdardy urlaǵanyn moıyndady. Kúdiktiniń sózine qaraǵanda, urlanǵan zattardy ol lombardqa tapsyryp otyrǵan.
Qazirgi ýaqytta onyń basqa osyǵan uqsas qylmystarǵa qatysy bar-joqtyǵy anyqtalyp jatyr.
