Astanada ústimizdegi jyldyń sáýir aıynan beri jóndeýden ótkizilip jatqan Aqjol kóshesi ashyldy - Astanalyq ІІD JPB
ASTANA. Shildeniń 9-y. QazAqparat - Astanada ústimizdegi jyldyń sáýir aıynan beri qaıta jóndeýden ótkizilip jatqan 6 jolaqty Aqjol kóshesi ashyldy. Bul týraly Astana qalalyq ІІD JPB baspasóz qyzmetinen habarlady.
«Óndiristik aımaq kóshesi aýdanynda ótkizý qabiletin arttyrý maqsatynda Aqjol kóshesine (burynǵy Ýgolnaıa kóshesi) qaraı taǵy bir jol salý týraly sheshim qabyldanǵan edi. Qazirgi kúni bul jolda ýaqytsha baǵdarsham quraldary qoıylyp, 6 jolaqty jol ashyldy. Esterińizge sala keteıik, osyǵan deıin Aqjol kóshesiniń joly eki jolaqty bolatyn», - delingen taratylǵan baspasóz málimdemesinde.
Sonymen qatar, basqarmanyń baspasóz qyzmeti JPB jol qadaǵalaý bóliminiń bastyǵy Nurlan Ubaevtyń sózine silteme jasap, tómendegideı aqparat taratady: «Kósheni abattandyrý, tehnıkalyq quraldar men jaıaý júrginshiler joldaryn qalpyna keltirý jumystary kem degende aldaǵy jyly aıaqtalady». JPB bul sheshimdi «atalmysh kósheni qaıta jóndeý jobasy 2011 jylǵa ótpeli bolýymen» túsindiredi.
