Astanada ústel tennısinen júlde qory 300 myń dollar bolatyn halyqaralyq týrnır ótedi
ASTANA. KAZINFORM – Elordada 15-20 qyrkúıek aralyǵynda ústel tennısinen WTT Star Contender Astana 2026 – President’s Cup halyqaralyq týrnıri ótedi, dep habarlaıdy Astana qalasy ákimdiginiń resmı saıty.
Bedeldi halyqaralyq jarys Jaqsylyq Úshkempirov atyndaǵy Jekpe-jek saraıynda uıymdastyrylyp, álemniń úzdik ústel tennısi sheberleriniń basyn qosady.
Týrnır QR Prezıdentiniń dástúrli kýbogi aıasynda ótedi. Sonymen qatar jarys halyqaralyq WTT (World Table Tennis) serııasy kezeńderiniń biri sanalady.
– WTT Star Contender Astana 2026 – President’s Cup álemniń úzdik ústel tennısi sheberlerin elordada toǵystyrady. Týrnırdiń jalpy júlde qory 300 myń AQSh dollaryn quraıdy, – delingen habarlamada.
Jarystyń ashylý saltanaty 15 qyrkúıekke josparlanǵan. 16-18 qyrkúıekte negizgi jarystar ótip, 19-20 qyrkúıekte fınaldyq kezdesýler uıymdastyrylady.
Halyqaralyq týrnırdi Nomad Table Tennis Academy ótkizedi.
12 jasqa deıingi balalar jarysty eresek adamdarmen birge tegin tamashalaı alady.
Aıta keteıik, Qazaqstannyń juptyq syndaǵy birinshi, álemniń 6-raketkasy Anna Danılına AQSh ashyq chempıonatynyń úshinshi aınalymyna óte almady.
