Astanada ústel tennısinen iri halyqaralyq týrnırler ótedi
ASTANA. KAZINFORM – Elimiz álemdik sport arenasyndaǵy ornyn nyǵaıtyp keledi. 2026 jáne 2027 jyldary Astana ústel tennısinen birqatar iri halyqaralyq týrnırdi qabyldaıdy.
Bul jarystardy ótkizý Qazaqstanda ústel tennısin damytýǵa jáne eldiń halyqaralyq sport arenasyndaǵy bedelin arttyrýǵa baǵyttalǵan júıeli jumystyń jalǵasy bolmaq. Aıta keteıik, 2022 jyldan beri Almaty qalasynda ústel tennısinen WTT álemdik serııasynyń kezeńderi turaqty túrde ótkizilip keledi.
Negizgi jarystardyń biri — 2026 jyly Astanada ótetin Star Contender serııasyndaǵy halyqaralyq týrnır. Bul doda byltyr Qazaqstanda alǵash ret sátti uıymdastyrylǵan President’s Cup halyqaralyq jobasynyń jalǵasy. Atalǵan týrnırdi byltyr Nomad Table Tennis Academy akademııasy ótkizgen bolatyn.
Sonymen qatar kelesi jyly elordada ústel tennısinen álem chempıonaty men Champions serııasyndaǵy týrnır uıymdastyrylady. Jarystar Jaqsylyq Úshkempirov atyndaǵy jekpe-jek saraıynda ótedi.
Halyqaralyq ústel tennısi federatsııasynyń prezıdenti Petra Sörling Qazaqstannyń halyqaralyq jarystardy ótkizýge daıyndyǵyn joǵary baǵalady.
Onyń aıtýynsha, joǵary deńgeıdegi sport pen halyqaralyq jarystardyń talaptaryn jaqsy túsinetin qalada týrnır ótkizý asa mańyzdy. Sondaı-aq ol jekpe-jek saraıynyń múmkindikteri men Astananyń áleýeti uzaqmerzimdi jobalardy sapaly júzege asyrýǵa múmkindik beretinin atap ótti.
Týrnırlerdiń uıymdastyrýshysy — Nomad Table Tennis Academy. Akademııa dırektory Rýslan Jetibaev Qazaqstanda ústel tennısine qyzyǵýshylyq artyp kele jatqanyn aıtty.
— Elimizde ústel tennısi qarqyndy damyp keledi. Sportpen turaqty aınalysatyndar sany artyp, ınfraqurylym keńeıip jatyr. Astanada osyndaı aýqymdy halyqaralyq týrnırlerdi ótkizý biz úshin úlken mártebe, — dedi ol.
Mundaı iri jarystar Qazaqstannyń álemdik deńgeıdegi sporttyq is-sharalardy joǵary deńgeıde uıymdastyra alatyn el retindegi ımıdjin nyǵaıtyp, otandyq ústel tennısiniń damýyna, jas sportshylardy daıarlaýǵa jáne álemdik sport qaýymdastyǵynyń nazaryn Qazaqstanǵa aýdarýǵa múmkindik beredi.
Aıta ketelik Qazaqstannyń jasóspirimder quramasy Junior Davis Cup týrnıriniń fınaldyq kezeńine shyqqan edi.
