Astanada ústel tennısinen álem chempıonaty ótedi

Osylaısha Qazaqstan atalǵan jahandyq dodany qabyldaıtyn Ortalyq Azııadaǵy alǵashqy memleket atanady.

10 mamyr kúni Londonda ótken komandalyq álem chempıonaty barysynda Qazaqstanǵa Halyqaralyq ústel tennısi federatsııasynyń (ITTF) týy resmı túrde tabystaldy. Bul — elimizdiń álem chempıonatyn ótkizýge daıyndyqty bastaǵanyn bildiretin mańyzdy rásim.

Qazaqstan 2027 jylǵy álem chempıonatyn ótkizý quqyǵyna 2025 jyly ITTF Bas assambleıasynyń sheshimimen ıe boldy. Daýys berýdiń qorytyndy kezeńinde Qazaqstan 111 daýys jınap, Frantsııany basyp ozdy.

Álem birinshiligine sportshylar, jattyqtyrýshylar, tóreshiler, delegattar jáne halyqaralyq sport qaýymdastyǵynyń ókilderin qosa alǵanda, shamamen 1250 qatysýshy keledi dep kútilýde.

Bul — Qazaqstandaǵy ústel tennısin damytý baǵytyndaǵy júıeli jumystyń nátıjesi. Qazirgi tańda elimizde 260 myńnan astam adam ústel tennısimen turaqty túrde aınalysady. Onyń ishinde 10 myńnan astamy — kásibı sportshylar. Respýblıka boıynsha 12 mamandandyrylǵan ústel tennısi ortalyǵy jumys isteıdi. Sonymen qatar Qostanaı, Oral, Semeı jáne Almaty qalalarynda jańa ortalyqtardyń qurylysy men jobalaý jumystary júrgizilip jatyr.

Sońǵy jyldary elimizde 30-ǵa jýyq ústel tennısi bólimshesi men 35 mamandandyrylǵan zal ashyldy. Óńirlerge 650-den astam kásibı tennıs ústeli satyp alyndy. Sonymen birge «Balabaqshadan bastalatyn ústel tennısi» jobasy aıasynda mektepke deıingi uıymdarda arnaıy sektsııalar jumys isteı bastady.

Qazaqstandyq sportshylar halyqaralyq arenada da joǵary nátıjeler kórsetip keledi. 2025 jyly ulttyq qurama sportshylary halyqaralyq reıtıngtik týrnırlerde 47 medal jeńip aldy. Erler quramasy Islam yntymaqtastyǵy oıyndarynda chempıon atansa, qazaqstandyq tennısshiler álem jáne Azııa chempıonattarynda sátti óner kórsetti.

Aıta ketý kerek, Qazaqstan buǵan deıin de iri halyqaralyq jarystardy uıymdastyrý tájirıbesine ıe. 2024 jyly Astanada ústel tennısinen XXVII Azııa chempıonaty ótip, jarysqa 25 elden 195 sportshy qatysty. Bul chempıonat Ortalyq Azııa aýmaǵynda alǵash ret uıymdastyrylǵan qurlyqtyq doda retinde tarıhqa endi.

2027 jylǵy álem chempıonaty — Qazaqstan sporty úshin mańyzdy oqıǵa. Atalǵan týrnır elimizdiń halyqaralyq sport keńistigindegi bedelin arttyryp, ústel tennısiniń odan ári damýyna jańa serpin beredi.

Aıta ketelik Alan Qurmanǵalıev pen Záýresh Aqasheva WTT Feeder Istanbul týrnırinde qola júlde alǵan edi.