Astanada ústel tennısinen ótetin týrnırdiń júlde qory 1 mln dollar
ASTANA. QazAqparat - 14-17 jeltoqsanda Astanada ústel tennısinen «World Tour Grand Finals 2017» álemdik týrynyń fınaldyq básekesi ótedi.
Osy sporttyq sharanyń júlde qory 1 mıllıon AQSh dollaryna jetti, dep habarlaıdy QazAqparat.
Úlken tennıstegi «Úlken dýlyǵa» jáne velosporttaǵy «Týr de Frans» týnırlerimen salystyrýǵa bolatyn «World Tour Grand Finals 2017» alǵash ret TMD aýmaǵynda ótkizilmek.
«Grand-fınalǵa álemniń úzdik sportshylary qatysady. Bular erler, áıelder arasynda tennısshilerdiń TOP-16 álemdik reıtıngisinde aldyńǵy qatardaǵylar, sondaı-aq juptyq synynda upaı sany boıynsha aldyńǵy orynda turǵandar. Baıraqty básekege qatysatyn sportshylar álemdik týrdyń 12 kezeńinde ótkizilgen jarystardyń qorytyndysy boıynsha saralanady. Qatysýshylardyń arasynda 5 olımpıada chempıony men 9 álem chempıony bar»,- dedi QR Ústel tennısi federatsııasynyń bas dırektory Serik Qasqabasov.
Onyń sózine qaraǵanda, bıyl týrnırdiń kezeńderi Býdapesht, Nıý-Delı, Inchhon, Panagıýrıshte, Olomoýts, Stokgolm, Doha, Tokıo, Chendý, Brısben, Lıntse, Magdebýrg qalalarynda uıymdastyryldy.
Aıta keteıik, fınaldyq saıys «Dáýlet» sport kesheninde ótedi. Bul sharadan álemniń 122 eline habar taratylady.
