Astanada ústel tennısinen ótetin saıys álemniń 122 elinde kórsetiledi
ASTANA. QazAqparat - Elordadaǵy «Dáýlet» sport kesheninde 2017 jyldyń 14-17 jeltoqsany aralyǵynda ústel tennısinen «World Tour Grand Finals» álemdik týrynyń aqtyq saıysy ótedi, dep habarlaıdy «QazAqparat» HAA tilshisi.
«World Tour Grand Finals» jarysyn QR ústel tennısi federatsııasy Halyqaralyq ústel tennısi federatsııasy men QR Mádenıet jáne sport mınıstrligi, Astana qalasynyń ákimdiginiń qoldaýymen ótkizip otyr. Uıymdastyrýshylardyń aıtýyna qaraǵanda, jarystyń deńgeıi atalǵan sport túrinen Olımpıada oıyndary nemese Álem chempıonatynan kem túspeıdi.
Grand-fınalda erler men áıelder arasyndaǵy álemdik reıtıngtegi eń úzdik TOP-16 sportshylary men World Tour jarysynyń 12 kezeńi boıynsha eń kóp upaı jınaǵan ústel tennısshileri bas qosady. Osy oraıda, Astanaǵa ústel tennısinen álemniń 9 chempıony jáne Olımpıadanyń 5 chempıony kele jatqanyn atap ótýge bolady.
Atalmysh týrnır - World Tour saıysynyń aqtyq serııasy. Ol jarys jyl boıy ótkizilip keledi. Bıylǵy jyly jarystyń 12 kezeńi Býdapesht (Vengrııa), Nıý-Delı (Úndistan), Inchhon (Koreıa), Panagıýrıshte (Bolgarııa), Olomoýts (Chehııa), Stokgolm (Shvetsııa), Doha (Katar), Tokıo (Japonııa), Chendý (qytaı), Brısben (Aýstralııa), Lınts (Avstrııa), Magdebýrg (Germanııa) qalalarynda uıymdastyrylǵan. Astana TMD elderi ishinde dál osyndaı aýqymdaǵy jarysty ótkizetin birinshi qala bolmaq.
«World Tour Grand Finals» saıysynyń translıatsııasy álemniń 122 eline taraıdy. Jalpy 122 elden 800 mıllıon kórermen Astanadaǵy saıysty tamashalaı alady. Júlde qory - 1 mıllıon AQSh dollary.
