Astanada ústel tennısinen marafon ótedi (FOTO)
ASTANA. QazAqparat - 28 maýsymda «Alaý» muz aıdyny saraıynda ekinshi «Astana cup - 2015» ústel tennısi marafony ótedi, dep habarlady astana.gov.kz.
Birinshi marafon Astana kúni merekesi qarsańynda ótip, onda 1000-nan astam sportshy sheberlik baıqasty. Týrnır qatysýshylar úshin naǵyz synaq boldy. Aqtyq jarys 11 saǵatqa sozyldy. Sheberlik pen tózimdilik baǵalanyp, atalym jeńimpazdary 1 mıllıon teńgelik júlde qoryn bólisti.
Bıyl júlde qory saqtalady, alaıda, týrnırdiń formaty biraz ózgeredi. Jarys olımpıadalyq júıemen ótkiziledi. Uıymdastyrýshylar jas ereksheligine qaraı bólinbeıtin «erler» jáne «áıelder» nomınatsııasyn qaldyrǵan. Basty shart týrnırge qatysýshy áýesqoı bolyp, ulttyq komanda quramyna kirmeýi jáne resmı týrnırler men chempıonattarǵa qatyspaýy kerek.
Birinshi aldyn-ala raýnd ótkizilip, úmitkerler toptarǵa bólinedi. Kelesi kezeńnen bastap qatysýshylar ár jeńisi úshin syılyq qorynyń bir bóligin alyp otyrady. Marafon reglamenti men qatysýǵa ótinishter «Alaý» muz aıdyny saraıynyń saıtynda (www.alau.info) jarııalanǵan.
