Astanada ustazdar qaýymdastyǵy men depýtattar jańa Konstıtýtsııa jobasyn talqylady
ASTANA. KAZINFORM — Búgin Astanadaǵy «Spectrum» halyqaralyq mektebinde «BІLІM-INNOVATsIıA» halyqaralyq qoǵamdyq qorynyń (HQQ) uıymdastyrýymen «Jańa Konstıtýtsııa — jańa dáýir kepili» atty saltanatty jıyn ótti.
Shara aıasynda bilim berý salasynyń mamandary men QR Parlamentiniń depýtattary Ata Zańǵa engizilgen reformalardy talqylap, onyń qoǵam ómirine tıgizer áserin saralady.
Jıynǵa Májilis depýtattary Únzıla Shapaq, Serik Erýbaev, Aıdos Sarym jáne Senat depýtaty Bıbigúl Jeksenbaı qatysty. Keleli keńesti «Bilim-Innovatsııa» HQQ prezıdenti Darhan Ermahanuly moderator retinde júrgizip, memlekettik mańyzy bar bastamalardy bilim berý qundylyqtarymen ushtastyrdy.
Talqylaý barysynda depýtattar men qatysýshylar Konstıtýtsııanyń 23-babyndaǵy «sóz erkindigine, ǵylymı jáne kórkem shyǵarmashylyq erkindigine beriletin kepildikter» týraly normalarǵa erekshe toqtaldy. Saıasatkerlerdiń pikirinshe, bul — zııatker ult qalyptastyrý jolyndaǵy mańyzdy qadam. Endigi kezde shıkizat emes, adam kapıtaly men jańa ıdeıalar el damýynyń negizgi qozǵaltqyshyna aınalmaq.
Jıynnyń eń áserli sátteriniń biri — suraq-jaýap bólimi boldy. «Spektrým» mektebinde eńbek etetin sheteldik mamannyń: «Jańa Konstıtýtsııa qarapaıym halyqtyń ómirinde zań ústemdigin qalaı qamtamasyz etedi?» — degen saýaly qyzý pikirtalas týdyrdy.
Bul saýalǵa jaýap bergen depýtattar men zańger-ǵalymdar Konstıtýtsııalyq sottyń róli, azamattardyń quqyǵyn qorǵaýdyń jańa tetikteri men «Ádiletti Qazaqstan» kontseptsııasynyń is júzindegi kórinisterin egjeı-tegjeıli túsindirip berdi.
Jıyn barysynda Parlament ókilderi Jańa Konstıtýtsııanyń ár salaǵa tıgizer oń áserin jan-jaqty taldap, ustazdar qaýymyna mańyzdy baǵyt-baǵdar berdi.
Senat depýtaty Bıbigúl Jeksenbaı jas urpaqtyń boıynda ulttyq qundylyqtar men quqyqtyq mádenıetti qalyptastyrý máselesine basymdyq berdi.
— Jańa Konstıtýtsııa — bul tek zańdar jıyntyǵy emes, bul bizdiń rýhanı kodymyzdy saqtaı otyryp, zamanaýı ashyq qoǵam qurýdyń jol kartasy. Aqparattyq qaýipsizdik máselesi de basty nazarda. Biz balalarymyzdy tsıfrlyq keńistiktegi jat aǵymdardan qorǵap, olardyń boıynda synı oılaý qabileti men medıasaýattylyqty damytýymyz kerek. Bul iste ustazdardyń róli erekshe, — dep atap ótti Bıbigúl Nurǵalıqyzy.
Májilis depýtaty, zańger-ǵalym Únzıla Shapaq adam quqyqtaryn qorǵaý tetikteriniń kúsheıtilýi týraly baıandady.
— Konstıtýtsııalyq sottyń qurylýy jáne azamattardyń tikeleı shaǵym túsirý múmkindigi — zań ústemdiginiń basty kepili. Bul ózgerister qarapaıym muǵalimniń quqyǵyn qorǵaýǵa, onyń eńbek jaǵdaıy men áleýmettik mártebesiniń zańmen shegelenýine tikeleı áser etedi. Ádilettilik — sottan emes, ár azamattyń quqyqtyq saýattylyǵynan bastalady, — dedi Únzıla Shapaqqyzy.
Májilis depýtaty Serik Erýbaev Ata Zańdaǵy ózgeristerdiń ekonomıkalyq turaqtylyqqa yqpalyn túsindirdi.
— Ekonomıkalyq erkindik pen menshik quqyǵynyń qorǵalýy bilim salasyna ınvestıtsııa tartýǵa jol ashady. Jańa Konstıtýtsııada memlekettiń áleýmettik mindettemeleri, sonyń ishinde bilim berýdi qarjylandyrý basymdyǵy aıqyn kórsetilgen. Turaqty zań — turaqty ekonomıkanyń kepili. Bul bilim berý mekemeleriniń materıaldyq-tehnıkalyq bazasyn nyǵaıtyp, jas mamandarǵa jańa múmkindikter beredi, — dep túıindedi Serik Sársenuly.
«Bilim-Innovatsııa» HQQ prezıdenti Darhan Ermahanuly Jańa Konstıtýtsııa — bul ádiletti qoǵamnyń irgetasy ekenin atap ótti.
— Biz tek pán úıretip qana qoımaı, sanaly, quqyqtyq mádenıeti joǵary azamat tárbıeleýimiz kerek. Jańa Konstıtýtsııa — bul ádiletti qoǵamnyń irgetasy, al ustazdar — sol irgetastyń berik bolýyn qamtamasyz etetin negizgi kúsh, — dedi ol.
Kezdesý sońynda qatysýshylar aldaǵy referendýmnyń tarıhı mańyzyn atap ótip, bul naýqannyń árbir azamat úshin jeke jaýapkershilik ekenin aıtty. Muǵalimder qaýymy quqyqtyq saýattylyqty arttyrý men demokratııalyq ózgeristerge belsene qatysýǵa daıyn ekendikterin bildirdi.
Budan buryn Erlan Saırov jańa Konstıtýtsııada azamattar quqyǵyna 30 bap arnalǵanyn aıtty.