Astanada «Ustaz» fılminiń tanystyrylymy ótti
ASTANA. KAZINFORM – Oqý-aǵartý mınıstrliginiń qoldaýymen Astanada «Ustaz» fılminiń tanystyrylymy ótti, dep habarlady mınıstrliktiń baspasóz qyzmeti.
Qazaqstan Respýblıkasy Oqý-aǵartý, Mádenıet jáne aqparat mınıstrlikteriniń jáne Jetisý oblystyq ákimdiginiń qoldaýymen búgin astanalyq pedagogter men bilim berý isiniń ardagerleri úshin jetisýlyq rejısser Erlan Oshaqbaevtyń «Ustaz» fılminiń tusaýkeseri uıymdastyryldy.
Fılmde jas ustazdyń týǵan aýylyna oralýy, ózi oqyǵan mektepte jumys isteýi, oqýshylarmen qarym-qatynasy, muǵalimniń bedeli, shákirtterin bilim básekesine qabiletti etýge degen umtylysy men jańashyldyǵy, sondaı-aq pedagogıkalyq qyzmettiń qıyndyǵy men qyzyǵy kórinis tabady.
Tanystyrylym kezinde sóz sóılegen oqý-aǵartý mınıstri Ǵanı Beısembaev mádenıet jáne aqparat mınıstrligimen birlesip, fılmdi elimizdiń basty telearnalarynan kórsetý jáne barlyq óńirlerde pedagogter qaýymdastyǵy arasynda taratý jóninde usynys bildirdi.
– Memleket basshysy pedagogtardyń qoǵamymyzda mańyzdy ról atqaratynyn atap ótken bolatyn. Bul sózder pedagogtardy qoldaýǵa jáne bilim sapasyn arttyrýǵa baǵyttalǵan naqty qadamdarmen bekitildi. Alǵashqy jáne mańyzdy qadamdardyń biri 2019 jyly QR «Pedagog mártebesi týraly» Zańynyń qabyldanýy boldy, ol pedagogtardyń jumys júktemesin azaıtý, artyq fýnktsııalardan bosatý jáne jańa yntalandyrý sharalaryn engizý máselelerin rettedi. Osy fılmniń negizgi mıssııasy — pedagogtyń tek mamandyq emes, naǵyz shaqyrý, mıssııa ekendigin kórsetý. Olardyń qoǵamdaǵy rólin tereń túsinýge, jas muǵalimder úshin jaýapkershilikti sezinýge jáne kásibı damýǵa shabyttandyratyn mańyzdy sebep bolatynyna senemin, – dedi mınıstr.
«Ustaz» fılminiń ıdeıa avtory – Beısen Quranbek, stsenarııin jazǵan – Gúlmıra Qadyrqyzy. Al fılm keıipkerleriniń rólderin Jetisý oblystyq drama teatrynyń jáne oqýshylar saraıyndaǵy poetıkalyq teatrdyń akterleri somdaǵan. Fılm Jetisý telearnasynyń qoldaýymen óńirde túsirilgen. Aldaǵy ýaqytta ol elimizdiń bas telearnalarynan kórsetilmek.