Astanada ustalǵan azamatty jábirlegen polıtsııa qyzmetkeri 5 jylǵa sottaldy
ASTANA. QazAqparat - Astanada ustalǵan azamatty jábirlegeni úshin polıtsııa qyzmetkeri 5 jylǵa sottaldy. Bul týraly Astana qalasynyń prokýratýrasynan habarlady.
Júrgizilgen tergeý barysynda Astana qalasy ІІD patrýldik polıtsııasynyń qyzmetkeri R. Toıǵulıev vokzal mańyndaǵy kezekshiliginde bolǵanda, qoǵamdyq orynda mas kúıinde júrgen úshin M. Başybekovty ustap, onyń kim ekendigin anyqtaý úshin polıtsııa bólimshesine jetkizý týraly sheshim qabyldaıdy.
"Saryarqa" aýdanynyń ІІB №20 polıtsııa bólimshesiniń mańynda polıtsııa qyzmetkeri ustalǵan adammen sózge kelip qalady, artynsha polıtseı onyń qolyna kisen taǵyp, álgini soqqynyń astyna alǵan.
"Denesine túsirgen jaraqatty jasyrý maqsatynda, R. Toıǵulov M. Başybekovty «Ásem» saýda aýmaǵyna aparyp, basyna mata baılap, jábirlenýshini jeke kóliktiń júksalǵyshyna salǵan", - dep naqtylady prokýratýrada.
Sodan keıin tártip saqshysy M. Başybekovty ıen daladaǵy qoqys óńdeıtin zaýyt mańyna aparyp, kisennen bosatyp, ony qoqys shuńqyryna tastap jibergen de oqıǵa ornynan izin sýytqan.
"Aıyptalýshy óz aıybyn moıyndamaǵanyna qaramastan, arnaıy prokýrordyń júrgizgen tergeýi barysynda R. Toıǵulovtyń bul qylmystyq áreketi tolyqtaı dáleldenip, is sotqa berildi. №2 Saryarqa aýdandyq sotynyń úkimimen R. Toıǵulov kináli dep tanylyp, 5 jylǵa bas bostandyǵynan aıyryldy. Úkim zańdy kúshine endi", dep habarlady prokýratýradan.
