Astanada úshinshi Eýrazııalyq áıelder sammıti ótedi

ASTANA. 20 qarasha. QazAqparat - Astanada 21-23 qarasha kúnderi úshinshi Eýrazııalyq áıelder sammıti ótedi, dep habarlady «Qazaqstannyń isker áıelderi qaýymdastyǵynyń» baspasóz qyzmeti.

Bul sharany QR Prezıdenti janyndaǵy Áıelder isi jáne otbasy-demografııalyq saıasat jónindegi Ulttyq komıssııanyń qoldaýmen atalǵan qaýymdastyq uıymdastyryp otyr.

Sammıttiń basty maqsaty - Eýrazııa keńistiginiń qoǵamdyq-saıası jáne ekonomıkalyq damýyna áıelderdiń qosqan úlesin pash etý jáne QR Tuńǵysh Prezıdentiniń genderlik saıasatty júzege asyrý jónindegi reformalaryna qoldaý kórsetý bolmaq.

Sammıt taqyryby - «Qoǵamdy áleýmettik jańǵyrtýdaǵy áıelderdiń kóshbasshylyǵy». Osy taqyryp aıasynda memleket pen bıznestiń áriptestigin nyǵaıtý, áıelderdiń eldiń saıası, ekonomıkalyq, áleýmettik ómirine belsene aralasýy, olardyń qoǵam ómiriniń áleýmettik jańǵyrýyna qosyp otyrǵan úlesi talqylanady.

Sammıtke eldiń barlyq óńirlerinen 350-den astam qatysýshylar, sondaı-aq Katar, Izraıl, Reseı, Belarýs, Ýkraına, Bashqurtstan, Ózbekstan jáne Qyrǵyzstan elderinen qonaqtar qatysady.

Onyń aýqymynda «Іskerlik jáne ekonomıkalyq daǵdylaryn damytý jolymen áıelderdiń múmkindigin keńeıtý» taqyrybynda halyqaralyq konferentsııa, iskerlik trenıngter,   otandyq óndirýshilerdiń - áıelder qolymen jasalǵan ónimder kórmesi ótedi. Oǵan Qazaqstannyń barlyq óńirinen áıelder basqaratyn 50-ge tarta kásiporyn óz ónimderin usynady.