Astanada úshem dúnıege keldi
ASTANA. QazAqparat - Elordadaǵy «Ana men bala ulttyq ǵylymı ortalyǵynda» jalpy salmaǵy 8 keli úshem dúnıege keldi, dep habarlaıdy ABUǴO baspasóz qyzmeti.
Úshemniń anasy Janar Jańabaeva bastapqyda estigen jańalyqqa sener-senbesin bilmedi. Endi Ǵanı, Imanǵalı, Aqnur jaryq dúnıe esigin ashty. Janar muny Táńirdiń syıy dep qabyldady, endi ananyń basty mindeti balalaryn aıalap-mápelep ósirý.
Úsh bala belgilengen merzimde týyldy, balalardyń jaǵdaıy jaqsy, salmaqtary 2,5 keli. Mundaı jaǵdaı óte sırek kezdesedi, tipti egizderdiń de salmaǵy mundaı bolatyn kez sırek. Qýanyshqa kenelip jatqan ata-ananyń úshemge deıin ómirge kelgen uldary búginde jeti jasqa tolǵan. Ol birden eki ini men bir qaryndasqa aǵa atanǵanyna tań-tamasha. Baqytty balaqaı anasy men baýyrlarynyń kelýine arnap bólme daıyndap qoıypty jáne anasyna olardy baǵýǵa kómektesýge ýáde berdi.
Taǵy bir qyzyǵy, úshem ákesiniń týǵan kúni - 20 maýsymda dúnıege keldi. Endi Jańabaevtar áýleti bir kúnde 4 adamnyń týǵan kúnin atap ótetin bolady.
Úshemniń áke-sheshesi Qaıyrjan men Janar Astanada jumys isteıdi. Endi olarǵa turǵyn úı ózekti máselege aınaldy. Memleket qoldaıdy degen úmitteri bar, olar respýblıkanyń jańa azamattaryn tárbıeleýge bar kúsh-jigerin salamyz dep otyr.
