Astanada ushaq bortynda janjal shyǵarǵan mas jolaýshy 10 táýlikke qamaldy
ASTANA. KAZINFORM — Antalııa — Astana reısiniń jolaýshysy áýe kemesiniń bortynda janjal shyǵaryp, polıtsııa qyzmetkerlerine qarsylyq kórsetken, dep habarlaıdy Polisia.kz.
Antalııa — Astana baǵyty boıynsha ushyp kele jatqan áýe kemesinde jolaýshylardyń biri borttaǵy tártipti buza bastaǵan. Alkogoldik ishimdik ishken er adam ózin agressıvti ustap, bylapyt sózder aıtyp, basqa jolaýshylarǵa kedergi keltirgen.
Áýe kemesi Astana áýejaıyna qonǵannan keıin jolaýshy kólik polıtseılerine tapsyryldy. Tekserý barysynda tártip buzǵan azamattyń 44 jastaǵy elorda turǵyny ekeni anyqtaldy.
Alaıda ushaq qonǵannan keıin de jaǵdaı jalǵasyn tapty. Ony polıtsııa bólmesine jetkizý kezinde er adam tártip saqshylarynyń zańdy talaptaryn oryndaýdan bas tartyp, qarsylyq kórsetken. Osyǵan baılanysty polıtseıler arnaıy qural — kisen qoldanýǵa májbúr boldy.
Tekserý qorytyndysy boıynsha er adam ishimdik ishý nemese qoǵamdyq oryndarǵa masań kúıinde kelý faktisi boıynsha jaýapkershilikke tartyldy.
Sonymen qatar usaq buzaqylyq jáne quqyq qorǵaý organy qyzmetkeriniń zańdy ókimine nemese talabyna baǵynbaǵany úshin sot er adamdy kináli dep tanyp, oǵan 10 táýlikke ákimshilik qamaý jazasyn taǵaıyndady.
Buǵan deıin elorda áýejaıynda mas kúıde qoǵamdyq tártipti buzǵan áıel jaýapqa tartylǵan bolatyn.
