Astanada úsh jasar balany óltirgen er adamǵa sot úkimi shyqty

ASTANA. QazAqparat – Qylmystyq ister jónindegi aýdanaralyq sot jas balanyń ólimine ákep soqqan qasaqana aýyr dene jaraqatyn keltirý faktisi boıynsha úkim shyǵardy, dep habarlaıdy QazAqparat Astana qalasy sotynyń saıtyna silteme jasap.

«Er adam ózimen birge turatyn áıeldiń úsh jasar balasymen jalǵyz qalǵanda, oǵan kenetten qasaqana aýyr dene jaraqatyn salǵan, oqıǵa sońǵysynyń ólimine ákep soqtyrdy. Qylmys jasaǵan kezde sottalǵan adamda medıtsınalyq kýálandyrý qorytyndysymen psıhoaktıvti zatty, atap aıtqanda tramadoldy qoldaný faktisi anyqtaldy», - delingen Astana qalasynyń qylmystyq ister jónindegi aýdanaralyq sotynyń habarlamasynda.

Er adam aıypty moıyndamaǵan. Balanyń dene jaraqatyna qatysy joq ekenin aıtyp, sottan ózin aqtaýdy surady.

Al jábirlenýshi ony balasyna dene jaraqatyn salǵany úshin kináli dep sanaıtynyn aıtty. Azamattyq talap qoıylmaǵan.

Sottalýshynyń kinási jábirlenýshiniń, maman men sarapshylardyń aıǵaqtarymen, medıtsınalyq-krımınalıstıkalyq jáne sot-medıtsınalyq saraptama qorytyndysymen, jasyryn tergeý áreketteriniń nátıjesimen jáne qylmystyq istiń basqa materıaldarymen dáleldendi.

Sot qylmystyq jaýaptylyq pen jazany jeńildetý isin anyqtaǵan joq.

Qylmystyq jaýapkershilik pen jazany aýyrlatý boıynsha sot sottalýshynyń is-áreketinde qylmystyń qaıtalaný qaýpi bar ekenin moıyndady. Óıtkeni ol buryn aýyr qylmys jasaǵany úshin eki ret bas bostandyǵynan aıyrylǵan.

Sot úkimimen QK-niń 106-babynyń 3-bóligine sáıkes qylmystyq quqyq buzýshylyq jasaǵany úshin er adam kináli dep tanylyp, 10 jyl merzimge bas bostandyǵynan aıyrý túrindegi jaza taǵaıyndaldy.

Sot úkimi zańdy kúshine engen joq.