Astanada úsh saıabaqta turǵyndar úshin tegin jattyǵýlar ótkiziledi
ASTANA. QazAqparat - 14 mamyrdan bastap 10 qyrkúıekke deıin «Astanalyq», «Stýdentter», «Jeruıyq» saıabaqtarynda elordanyń úzdik jattyqtyrýshylary qalanyń barlyq turǵyndary men qonaqtaryna sporttyń bes baǵyty boıynsha tegin jattyqtyrý sharalaryn ótkizedi: CrossFit, Zumba-dancing, combat-battle, djıý-djıtsý jáne ıoga.
Qala ákimdigi saıtynyń habarlaýynsha, sporttyq sharalar EKSPO-2017 Halyqaralyq mamandandyrylǵan kórmesi aıasynda iske asady.
«Sharany biz osymen ekinshi jyl qatarynan uıymdastyryp jatyrmyz. Jańa maýsym ótken demalys kúni bastaldy. Byltyrǵy jylmen salystyrar bolsaq, negizgi erekshelikteri bizdiń aýqymymyz keńeıdi, taǵy «Stýdentter», «Jeruıyq» saıabaqtary qosyldy. Barlyq alańdarda bir ýaqytta, tańerteń saǵat 10-da jalpy dene shynyqtyrý jattyǵýlary jasalady», - deıdi sharany uıymdastyrýshy Asan Júnisov.
«Biz adamdardyń sportqa degen qulshynysyna senemiz. Sharamyz áleýmettik jáne tegin túrde júrgiziledi. Qatysýshylar sanynyń artyp jatqany qýantady. Eger ótken jyly ekinshi jattyǵýlarǵa 30 adam ǵana kelse, al búgin tek «Astanalyq» saıabaǵynda jattyǵý bastalǵanǵa deıin 100-den astam turǵyn tirkeldi», - dedi uıymdastyrýshy.
Astananyń kóptegen turǵyndary úshin «Fitness Park Astana» - súıikti sharaǵa aınaldy. Alaıda arasynda alǵash qatysyp jatqandar az emes. Kross-fıt boıynsha bapker Romannyń aıtýynsha, oǵan jattyǵýǵa kásipkerlerden bastap, úı sharýasyndaǵy áıelder balalarymen birge keletin kórinedi.
«Bıyl jańadan qatysýshylar kóp. Kross-fıt sporttyń aýyr túri ekenin eskersek, bizge daıyndyǵy ártúrli adamdar kele bastady. Bul árıne, qýantady. Bastysy, qulshynys emes pe? Biz barlyq úsh alańda jattyǵýlar júrgizemiz jáne ár jeksenbi kúnderi osylaı bolady dep úmittenemiz», - deıdi ol.
Sharanyń negizgi mindeti - qala turǵyndarynyń ýaqytyn tıimdi ári densaýlyqqa paıdaly etip uıymdastyrý. ıÝlııanyń aıtýynsha, combat-battle jattyǵýyna eki kishkentaı qyzymen kelgen. Sportpen zalǵa qaraǵanda, dalada shuǵyldanǵan áldeqaıda jaǵymdy ári qyzyqty.
«Maǵan óte qatty unady. Al balalar tańǵalysynda shek joq. Biraq biz bul jerge alǵash ret keldik. Úlken áser aldym. Bul jerde erekshe energetıka bar. Kelesi demalys kúni mindetti túrde qaıta kelemiz», - deıdi qatysýshy ıÝlııa.
Esterińizge salamyz, «Fitness Park Astana» jobasy «Astanalyq», «Jeruıyq», «Stýdentter» saıabaǵynda 10-shy qyrkúıekke deıin jalǵasady. Jattyǵý jeksenbi kúnderi saǵat 10:00-de ótkiziledi. Astanada joba qalalyq ákimdiktiń qoldaýymen uıymdastyrylýda.
