Astanada úsh oqýshyny qaǵyp ketken júrgizýshi ýaqytsha oqshaýlaǵyshqa qamaldy
ASTANA. QazAqparat - Astana qalasynyń Іshki ister departamenti Momyshuly dańǵyly men Amanat kóshesiniń qıylysynda oqýshy úsh balany qaǵyp ketý oqıǵasyna qatysty sotqa deıingi tergeýdi bastady, dep habarlaıdy QazAqparat.
«Astana qalasynyń ІІD Anyqtaý basqarmasy QR QK-niń 345-baby boıynsha tergeý júrgizýde. Qaǵyp ketý faktisi sotqa deıingi tergeýlerdiń biryńǵaı tirkeýine alyndy. Sot-medıtsınalyq saraptama taǵaıyndaldy. Kólik júrgizýshisi Ýaqytsha ustaý oqshaýlaǵyshyna qamaldy. Avtokólik kommýnaldyq aıyppul turaǵyna qoıyldy», - delingen taratylǵan habarlamada.
Jol apaty saldarynan 2007 jylǵy eki bala jáne 2001 jylǵy bir bala dene jaraqattarymen aýrýhanaǵa jetkizildi. 2007 jylǵy balalardyń biri medıtsınalyq kómekten keıin úıine jiberildi.
Eske salsaq, búgin, 4 qyrkúıek kúni «Leksýs» kóligin basqarǵan 21 jastaǵy júrgizýshi Momyshuly dańǵyly boıymen kele jatyp, Amanat kóshesiniń qıylysynda baǵdarshamnyń tyıym salynǵan túsine júrip ketip, kámeletke tolmaǵan úsh balany qaǵyp ketti. Jaıaý júrginshiler joldy baǵdarshamnyń ruqsat etilgen túsine ótip bara jatqan.
