Astanada úsh oblystyń dámi toǵysady: jármeńkege 400 tonna ónim qoıylady
ASTANA. KAZINFORM — Astanada 26-27 qyrkúıek kúnderi Mańǵystaý, Almaty jáne Abaı oblystarynyń taýar óndirýshileri qatysatyn kezekti aýyl sharýashylyǵy jármeńkesi ótedi, dep habarlaıdy Astana ákimdiginiń resmı saıty.
Turǵyndarǵa fermerlerden tikeleı jetkiziletin et, balyq, sút jáne azyq-túlik ónimderiniń túr-túri usynylady. Bul azyq-túliktiń qoljetimdiligin arttyryp qana qoımaı, otandyq óndirýshilerdi qoldaýǵa múmkindik beredi.
Atap aıtqanda, úsh óńirdiń aýyl sharýashylyǵy taýaryn óndirýshileri Astanaǵa 400 tonnadan astam ónim ákeledi. Onyń ishinde 170 tonna kókónis pen jemis-jıdek, 100 tonna et jáne et ónimderi, 40 tonna bal, 25 tonna sút ónimderi, 17 tonna baqsha ónimi, 10 tonna balyq jáne 40 tonnadan astam basqa da azyq-túlik bar.
Jármeńke «Qazanat» ıppodromynyń avtoturaǵynda, Qarqaraly tasjoly, 1 mekenjaıynda ótedi.
Sondaı-aq jármeńke kezinde elorda turǵyndary men qonaqtaryna yńǵaıly bolý úshin atalǵan orynǵa №18, 37 jáne 303 avtobýs baǵyttary qatynaıdy.
Jármeńke saǵat 09:00-den 18:00-ge deıin jumys isteıdi.
Buǵan deıin Túrkistan oblysynda áleýmettik mańyzy bar azyq-túlik qory qansha aıǵa jetetinin jazǵanbyz.
