Astanada úsh qurylysshynyń bıikten qulaý faktisi boıynsha qylmystyq is qozǵaldy

ASTANA. KAZINFORM — Astanada turǵyn úı kesheniniń qurylys alyńynda úsh jumysshy shamamen besinshi qabattan qulap, jaraqat aldy.

Polıtsııa departamentiniń málimetinshe, jumysshylar bıiktikte ornatylǵan qurylys jabdyǵynyń úzilýi saldarynan qulaǵan. 

— Atalǵan fakti boıynsha qurylys jumystaryn júrgizý kezinde qaýipsizdik talaptaryn buzý belgilerimen qylmystyq is qozǵaldy, — dep málimdedi vedomstvo.

Oqıǵa saldarynan zardap shekken úsh jumysshy medıtsınalyq kómek kórsetý úshin aýrýhanaǵa jetkizildi.

Qazirgi ýaqytta oqıǵanyń mán-jaıy anyqtalyp jatyr.

Eske salsaq, elordada turǵyn úı qasbetiniń kirpish qaptamasy qulap, jaraqat alǵan feldsher kóz jumdy.

Sonymen qatar Astanada kópqabatty turǵyn úılerdiń birinde jóndeý jumystary kezinde lıft qulady. Oqıǵa saldarynan lıftige jaýapty kompanııanyń bir qyzmetkeri qaza taýyp, eki qyzmetker jaraqat aldy. Bul jaǵdaıǵa qatysty zańger Nurjigit Sultanbek Jibek Joly telearnasynyń «Búgin LIVE» baǵdarlamasynda pikir bildirgen edi.